Birgitte Flote, Kristian Havnes Klemetzen og Jan Erik Finsæther.
Sunnmørsposten hentar tre journalistar til Ålesund : – Vi er svært nøgde
– Kvar for seg vil dei styrke oss på viktige felt, seier avisas nyheitsredaktør.
Sunnmørsposten har tilsett journalistane Birgitte Flote, Kristian Havnes Klemetzen og Jan Erik Finsæther. Det skriv dei i ei melding til Medier24 fredag ettermiddag.
Flote og Havnes Klemetzen er nyheitsjournalistar, mens Finsæther er videojournalist.
Flote har jobba i Stavanger Aftenblad sidan 2016 og vart fast tilsett der i 2018.
Ho har siste åra vore politisk reporter med spesielt ansvar for dekninga av Sandnes. Spesialfelta har vore oppvekst, sosial og vindkraft. Flote kjem frå Folkestad i Volda kommune og er utdanna journalist frå Høgskulen i Volda.
I tillegg har ho fleire årsstudium, i emna nordisk språk og litteratur, pedagogikk og religion livssyn og etikk. Flote startar i Sunnmørsposten i august.
- Vi er svært godt nøgde med å få denne trioen inn i redaksjonen. Kvar for seg vil dei styrke oss på viktige felt, og i sum betyr dette meir og betre journalistikk både i ord, lyd og bilete frå Sunnmørsposten, seier Sindre Halkjelsvik, nyheitsredaktør i Sunnmørsposten.
Hentar journalist frå VG
Kristian Havnes Klemetzen kjem frå jobb som journalist og frontsjef i nyheitsgruppa og breakinggruppa i VG. Der har han jobba siste året.
Før det var han i Aftenposten som deskjournalist og innanriksreporter og i NRK Dagsrevyen som TV-reporter og nettjournalist for nrk.no.
Han kjem frå Molde og jobba mykje som nyheitsjournalist for Romsdals Budstikke medan han tok journalistutdanninga i Volda 2016-2019.
Han hadde praksisperioden i studiet som nyheitsreporter i TV2. Kristian startar i Sunnmørsposten 4. april.
Frå Marienlyst til Ålesund
Jan Erik Finsæther er tilsett som videojournalist i fast stilling i Sunnmørsposten.
Ålesundaren har sidan august i fjor vore tilsett i prosjektstilling i Polaris Media streamsenter.
I ei overgangsperiode vil han dele på arbeidstida mellom streamsenteret og videojournalistjobben.
Jan Erik er utdanna medieingeniør og har 15 år bak seg som videofotograf i NRK Marienlyst. Der har han lang erfaring frå store produksjonar, som mellom anna «Monsen minutt for minutt» og «Svalbard minutt for minutt».
