Dette er all reklamen i Dagens Næringsliv tysdag: – Alvorleg

Denne veka har annonsekollapsen i norsk mediebransje som følgje av koronakrisa for alvor kome til uttrykk i papirutgåvene til Dagens Næringsliv.

Måndag hadde avisa to bannerannonsar, frå høvesvis House of Control og Koppang Landbruk, på side 15 og 16.

Tysdag skulle bli endå verre. Då var ei lita bannerannonse frå Hemsedal-hotellet FÝRI, nede i hjørna av side ni, all reklamen i avisa.

Senkar prisane

Dermed måtte avisa fylla reklameplassar med eigenreklame og redaksjonelt innhald.

– Det er alvorleg, men me har prioritert den digitale omsetnaden. Der er det lettare å snu seg rundt og gjera ting – men no må me senka prisane betydeleg på print, seier sjefredaktør og administrerande direktør Amund Djuve i NHST-eigde DN til Medier24.

Han fortel at avisa fram til koronakrisa hadde god annonseutvikling, og vekst samanlikna med fjoråret. Særleg digitalt.

– Det er der me har snudd oss raskast og gjort ting med prisar, og så har me nok ikkje vore like raske på print, seier han.

Kor mykje dei skal kutte prisane me er enno ikkje avklart. Han fortel at annonsørane har ein blanda respons til den økonomiske utviklinga.

– Nokon kansellerer kampanjar, nokon held på vent, medan andre er opne for å vurdera nye ting og bruka perioden til å ta marknadsdelar. Når ein skal kutta i alle baugar og kantar sit også veldig mange på gjerdet, held han fram.

Annonsørar betydeleg påverka av korona

Ein fersk rapport gjennomført av ANFO Annonsørforeningen forklarar ein del av utviklinga som avisene no kjenner effekten av.

Heile 57 prosent av 108 annonsørar som har svart på undersøkinga seier dei er betydeleg påverka av koronautbrotet, ifølgje rapporten «ANFO Corona Tracker».

Heile 86 prosent av annonsørane seier dei har justert marknadsplanar og -aktivitetar, 58 prosent har kutta reklameinvesteringane og berre sju prosent har flytta reklamekroner frå internasjonale medieplattformer til norske mediehus.

– Det er heilt tydeleg at dette er alvorleg, og alle håpar at denne situasjonen normaliserer seg fortast mogleg, seier administrerande direktør Jan Morten Drange i ANFO Annonsørforeningen til Medier24.

Aldri hatt så låge annonseinntekter

DN har enno ikkje sendt ut permitteringsvarsel, og Djuve seier han ikkje heller vil kommentera kva som eventuelt ligg på trappene.

Fredag sa Djuve til Medier24 at han aldri har opplevd ein så låg annonseomsetnad på denne tida av året før.

– Me har aldri vore i nærleiken når det kjem til trafikk og sal av abonnement, sa Djuve, og legg til:

– På den andre sida: Me har aldri hatt så låge annonseinntekter på denne tida av året før.

– Er de uroa for den økonomiske effekten?

– Det kjem an på kor lenge det varar.