Styreleiar Silje S. Skiphamn og sekretariatsleiar John Bones i SKUP. Her under årsmøtet 29. mars 2019.

Erik Waatland

Skup dobla overskotet: No har konferansen 1,6 millionar i eigenkapital

Beste årsresultat på 15 år for gravekonferansen.

Publisert 27.05.2020 - 08:25

Denne artikkelen er over to år gammel.

Skup fekk i 2019 eit resultat før skatt på 428.00 kroner, opp frå 203.000 i 2018, kjem det fram av årsrekneskapen som vart offentleggjort nyleg.

Konferansen hadde ein nedgang i inntekter, men kom likevel betre ut på botnlinja enn året før.

– Me er nøgd med resultatet. Det er om lag dobbelt så bra som dei siste åra, seier styreleiar Silje Sjursen Skiphamn i Skup til Medier24.

Skup	2019	2018	Endring
Omsetning	4,6 mill.	4,9 mill.	-6.1%
Driftsresultat	0,4 mill.	0,2 mill.	100%
Resultat før skatt	0,4 mill.	0,2 mill.	100%

Driftsmargin	8.5 %	3.9 %

Årsresultatet er det beste sidan dei fekk eit overskot på 485.000 kroner i 2004.

1,5 millionar kroner i støtte

At stiftinga hadde eit inntektstap i 2019 kjem som følgje av ei rekneskapsteknisk endring, ifølgje Skiphamn.

– Før vart alt folk betalte inn til Skup og Data-Skup ført som inntekter. Men frå og med 2019 inntektsfører me det ikkje det dei betaler inn til hotellet. Difor er konferanseinntektene halvert.

At inntektene held seg relativt stabilt likevel skuldast ei støtte på 1,5 millionar kroner frå Utanriksdepartementet til gravekonferansen Global Investigative Journalism Conference, for å støtta undersøkande journalistikk i Asia, Midt-Østen og Afrika.

Skup hadde ved utgangen av 2019 ein bokført eigenkapital på 1,6 millionar kroner.

Redda av bransjen

Som følgje av koronakrisa var konferansen, som skulle bli arrangert siste helga i mars, nøydd til å avlysa. Likevel ser det ut til at stiftinga kjem seg gjennom 2020 heilskinna. Schibsted, Amedia, Aller Media, Polaris Media, NHST, TV 2, NRK og ein rekkje frittståande medum har alle sagt at dei ikkje krev pengane tilbake.

– 2020 blir mykje betre enn me kunne ha håpa på. Nok ein gang har mediebedriftane, store og små, stilt opp for oss. Konferansen er hovudinntektskjelda vår, så me er veldig takksame for at dei store mediekonserna dei lot oss halda konferanseavgifta, seier Sjursen Skiphamn til Medier24.

– Korleis blir inntektene dykkar i år?

– Det veit me ikkje enno. Me driv stadig og betalar ut løpande.

Uføre tilbake i tid

For nokre år tilbake var Skup i hardt vêr, då det vart avdekka kluss i rekneskapen, manglande dokumentasjon av kostnader og privat, ikkje-autorisert forbruk. Tidlegare leiar Jens Egil Heftøy vart i haust dømt til 60 dagar samfunnsstraff for underslag.

SKUP-leiinga på tilhøyrarbenken under rettssaka i Oslo tingrett i fjor haust.

I tillegg sleit konferansen med store økonomiske problem, og det vart sett i gang ei kronerulling som drog inn éin millionar kroner. No har dei altså klart å samla opp ein eigenkapital på nærare 1,6 millionar kroner.