Styreleiar Silje S. Skiphamn og sekretariatsleiar John Bones i Skup. Her under årsmøtet 29. mars 2019.Erik Waatland
Koronafrykt:
Krisemøte i Skup-styret: Uaktuelt å utsetja konferansen
– Ein vanskeleg situasjon for oss når så store aktørar er usikre på om dei vil senda sine tilsette på konferansen, seier Skup-styreleiar Silje Sjursen Skiphamn til Medier24.
Torsdag skreiv Medier24 og Journalisten om uroa mediekonsern som vurderer si deltaking på gravekonferansen Skup (Stiftelsen for en kritisk og undersøkende presse) i Tønsberg siste helga i mars, som følgje av koronafrykt.
Konsernsjef Per Axel Koch i lokalaviskonsernet Polaris Media bad, overfor Journalisten, Skup utsetja konferansen. Både Schibsted, NRK, TV 2, NHST, NTB og Aller Media skal ta nye vurderingar på om dei sender journalistar til konferansen, sa dei til Medier24 torsdag.
Forpliktande avtale
Det skapte uro i Skup-styret, som fredag samla seg for eit aldri så lite krisemøte.
Skup har no kome fram til at konferansen går som planlagt, og at det ikkje er praktisk mogleg å utsetja arrangementet på Quality Hotel Tønsberg.
Styreleiar Silje S. Skiphamn i Skup.Erik Waatland
– Me har ein forpliktande avtale med hotellet i Tønsberg, då me inngår treårige avtalar der datoen vart fastsett, seier styreleiar Silje Sjursen Skiphamn til Medier24.
Strenge hygienerutinar
Hos Quality Hotel Tønsberg i Tønsberg går alle konferansar denne månaden som planlagt, bortsett frå eitt, som er for folk i kreftbehandling, seier ho vidare.
Skup-styret:
Leiar: Silje Sjursen Skiphamn, Faktisk
Nestleiar: Synnøve Åsebø, VG
Styremedlemmer: Connie Bentzrud, Fædrelandsvennen Kristoffer Egeberg, Faktisk Eiliv Frich Flydal, Dagbladet Maria Hasselgård, NRK Marcus Husby, Dagens Næringsliv Fredrik Kirkevold, TV 2 Kristoffer Rønneberg, Aftenposten Eystein Røssum, Bergens Tidende Ingerid Salvesen, Frilans Maren Sæbø, Bundu Nina Selbo Torset, Aftenposten Marianne Tønset, Adresseavisen
Økonomiansvarleg: Shazia Majid, VG
– Dei har innført nye, strenge hygienerutinar, og har oppdatert beredskapsplanane sine, slik at dersom det oppstår smittetilfelle har dei planar for korleis det skal handterast, seier Sjursen Skiphamn.
– Kommunelegen seier det ikkje er behov for å avlysa, og det er ikkje komen informasjon frå Folkehelseinstituttet som tilseier at det bør gjerast, så me steller oss til deira faglege råd. Men me følgjer situasjonen tett, legg ho til.
– Det skapar ein vanskeleg situasjon for oss når så store aktørar er usikre på om dei vil senda sine tilsette på konferansen, seier ho.
– Bør ein ta det meir med ro?
– Ja, det er ingenting med dei faglege råda som tilseier at det bør utsetjast.
Fleire hundre vurderer deltaking
Skup - Stiftelsen for en kritisk og undersøkende presseMartine Eren Jacobsen
Per no er det 83 påmelde deltakarar frå NRK og 64 frå TV 2. Schibsted stiller også sterkt med 41 frå VG, 40 frå Aftenposten, 18 frå E24 og 11 frå Stavanger Aftenblad – i tillegg til kommunikasjonsdirektør Camilla Kim Kielland.
NHST har 32 personar påmelde frå Dagens Næringsliv, Morgenbladet og konsernleiinga. Aller Media er påmeld med 13 frå Dagbladet og éin frå konsernet.
Amedia og Polaris eig totalt over 120 medium, og er bredt representert på deltakarlista.
