DN-journalistane Kjetil Sæter og Markus Tobiassen då dei vann SKUP-prisen i 2019.

Martine Eren Jacobsen

Dato for utdeling av Skup-prisen er klar

Laurdag 25. april klokka 20.00 blir Skup-prisen delt ut digitalt.

Publisert 16.04.2020 - 13:31

Denne artikkelen er over to år gammel.

Spreiinga av koronaviruset i Norge sette ein effektiv stoppar på det meste av folkerike arrangement denne våren, deriblant Skup-konferansen som var planlagd til siste helga i mars.

Den prestisjefylte Skup-prisen, og -diplomane, skal likevel delast ut. No har Skup-styret bestemt seg for datoen.

Laurdag 25. april skjer det digitalt.

– Det blir eit arrangement med underhaldning og prisutdeling, seier Skup-leiar Silje Sjursen Skiphamn til Medier24.

– Kva kan me venta oss av underhaldning?

– Det må nesten vera ei overrasking.

Komikar Martin Beyer Olsen blir konferansier, og juryleiar Bernt Olufsen skal som vanleg dela ut prisen.

Sjursen Skiphamn seier dei skal bruka noko av underhaldninga som allereie var bestilt til sjølve konferansen. Mellom anna eit innslag å Late Night Show.

Ho er budd på ei prisutdeling langt frå det vanlege.

– Me skulle veldig gjerne delt dei ut i Tønsberg, men når situasjonen er som den er, så tenkjer me òg at folk treng ei hyggeleg oppleving. Det trur eg det kjem til å bli, seier Sjursen Skiphamn.

– Det sit mange spente journalistar og leiarar rundt i redaksjonane og lurer på kven som vinn Norges mest prestisjefylte journalistpris, legg ho til.

Det er 43 bidrag som konkurrerer om prisen, og vinnaren får 50.000 kroner i prispremie.