Fotball-leiar «grilla» for klubbens Pride-deltaking. Det likte han dårleg

«Kretsen vil ha alle fotballklubbene med i prideparade» er tittelen på ei sak i Stavanger Aftenblad om at Norges Fotballforbund (NFF) Rogaland i år oppfordrar alle klubbane i krinsen til å delta på arrangementet til FRI Rogaland.

Avisa har fått fleire meldingar frå foreldre som reagerer på at Brodd FK oppfordrar deira born til å delta i paraden. Dei har i tillegg intervjua kunstnar og feminist Tonje Gjevjon, som sjølv er lesbisk og kritisk til Pride.

Dagleg leiar i Brodd FK, Øyvind Jacobsen, har difor fått ei rekkje kritiske spørsmål om korleis dei har reflektert rundt Pride, arrangørorganisasjonen FRI og deira politiske plattform.

Då Jacobsen såg artikkelen, skreiv han eit innlegg på Facebook kor han ytra sterk misnøye med spørsmåla han fekk. Jacobsen sit i bystyret i Stavanger og er kandidat for Arbeidarpartiet i årets kommuneval.

• Sjå spørsmåla Jacobsen fekk av Aftenbladet nedst i denne artikkelen.

«Og så oppfordrer jeg ALLE som vil vise at retten til å elske den man elsker er det viktigste i livet, også om man er homofil eller lesbisk, om å støtte opp om saken – på sin måte. Spesielt Aftenbladets sjefredaktør Lars Helle», skriv Jacobsen. Innlegget har på 16 timar fått 273 likarklikk, 61 kommentarar og tre delingar.

Sjefredaktør i Stavanger Aftenblad, Lars Helle, reagerer sterkt på innlegget til Jacobsen.

– Øyvind Jacobsen er høgt og lågt i mange saker, men her meiner eg han bommar fullstendig, og forsøker å gjere dette til ei sak om at Aftenbladet ikkje støttar homofile sine rettar, seier Helle til Medier24.

Vidare skriv Jacobsen:

«At Aftenbladet i tillegg skriver på førstesiden at vi ber 8-åringer gå i toget, er selvfølgelig feil. Vi har sendt invitasjoner til foreldrene til 8-åringene, og sagt at de selvfølgelig kan ta med barna sine, gjerne iført Brodd-drakt. Om de vil. Ønsker. Har tid. Og støtter saken.»

– Handlar om å feire kjærleiken

Han utdjupar kritikken overfor Medier24:

– Eg reagerer på vinklinga. Eg fekk i tillegg ei rekkje spørsmål som ikkje kom på trykk. Dei ynskjer å setje på plass eit idrettslag som oppfordrar til å stille opp på Pride.

– Kan ein ikkje stille spørsmål om andre politiske, omdiskuterte, spørsmål knyt til FRI og Pride? Dei har i tillegg intervjua ei lesbisk kvinne som er kritisk til Pride.

– Dette er ei sak som handlar om det er greit for eit idrettslag å feire kjærleiken. Det er ingen problem å stille spørsmål ved om me har gjort oss tankar om FRI. Det gjorde dei, og fekk eit enkelt svar. Eg reagerer på tiraden av oppfølgingsspørsmål.

– Du oppmodar spesielt Lars Helle til å vise støtte til homofile sine rettar framover. Er det ein motsetnad av å publisere saker med kritiske spørsmål om Pride?

– Nei, men eg trur det er viktig at leiande «influensarar» stiller opp – òg i 2019. Når fotballen endeleg opnar opp for homofile, vert det møtt med ein haug kritiske spørsmål, i staden for at ein ser på det som er bra, seier Helle, og legg til:

– Kanskje dei kunne stilt kritiske spørsmålet til den feministen som kritiserer Pride?

– Dei har jo stilt Gjevjon spørsmålet «er det ikke flott at fotballen engasjerer seg for de homofiles rettigheter?»

– Å, ja, det hadde ikkje eg sett.

Jacobsen meiner Aftenbladet heller kunne vinkla på homofile sin posisjon i fotballen, og ikkje kva organisasjonen (FRI, journ. anm.) står for og kva andre kampar dei kjempar.

– Eg kunne gått i tog for sterkare venskap i regi av Partiet Dei kristne, sjølv om eg er fundamentalt usamd med deira saker.

Jacobsen har sjølv lang erfaring som journalist i VG, Rogalands Avis og Stavanger Aftenblad.

– Han har ikkje følgt med i timen

Lars Helle forsvarar avisa si vinkling på saka.

– Det handlar om å forklara kva Pride og FRI er. Det veit ikkje alle. Dei som går i Pride, må kanskje vite kva dei går i. Dette handlar ikkje om Aftenbladet si haldning til homofile sine rettar.

Organisasjonen FRI – Foreningen for kjønns- og seksualitetsmangfold jobbar for å tillate sexkjøp, eggdonasjon og surrogati og for å sikre rettar for personar som lev i polygamiske forhold, skriv avisa.

Helle meiner ikkje dei har «revolverintervjua» Jacobsen.

– Det er eit heilt vanleg intervju. Skal intervjua ha ein annan karakter når det handlar om Pride, spør han retorisk.

Vidare viser han til at Aftenbladet er blant få aviser som har støtta opp om fleirkjønna garderobar og toalett.

– Me hadde i tillegg ein lang reportasjeserie om homofili i fotballen i fjor, seier han.

Helle legg til:

– Kvifor han er fornærma er over mi fatteevne. Han veit betre enn å stemple Aftenbladet som anti-pride og -homofile. Då har han ikkje følgt med i timen.