To finalistar står att som moglege «Pressens Hus»

Fredag skal dei to alternativa presenterast for styret i Norsk Presseforbund.

Publisert 29.11.2018 - 14:35

Denne artikkelen er over to år gammel.

– Det er ikkje noko nytt eller ei stor utvikling i saka, anna enn at eg skal orientere styret fredag, seier leiar for arbeidsgruppa, Per Brikt Olsen, til Medier24.

Då Medier24 skreiv om «Pressens Hus» for halvannan månad sidan var det fire adresser i høvesvis Skippergata, Kongengsgate, Universitetsgata og St. Olavs gate det sto mellom.

Jobbar intenst

No er Kongengsgate og St. Olavs gate slått ut i semifinalane, og Skippergata og Universitetsgata står att som dei beste alternativa.

Ei endeleg avgjerd kjem truleg ikkje før i første kvartal 2019. I 2020 skal dei etter planen flytte inn i nye lokale.

– Me jobbar intenst med dei to, seier Brikt Olsen.

– Me har nokre kriterium. Det må ha gode kontorlokale for alle, og så må det ha eit bra fellesareal. Begge desse to meiner me kan definere «Pressens Hus», seier han vidare.

Faktisk.no med?

Det er åtte medieorganisasjonar som leitar etter nytt samlingspunkt for journalistikken, i tillegg til at Faktisk.no er invitert med i samarbeidet.

– Dette er ein gammal idé som har vore oppe på bordet mange gongar. Og som me no har lyst til å realisere. Fordi me ser kor viktig samhandling er på alle områda kor me står saman, sa generalsekretær i Norsk Presseforbund, Elin Floberghagen, til Medier24 i vinter.

Faktisk-redaktør Kristoffer Egeberg var positiv til invitasjonen, og vonar å bli med på flyttelasset inn i «Pressens Hus», då deira eigen leigeavtale går ut i 2020 – same år organisasjonane håpar å vere innflyttingsklar.

– Ja, me tykkjer planane rundt eit «Pressens Hus» er superspanande, og er veldig glade for å ha blitt invitert med inn i prosjektet, sa Faktisk.no-redaktør Kristoffer Egeberg til Medier24 i oktober.

Desse medieorganisasjonane er knyt til prosjektet:

Mediebedriftenes Landsforening(MBL)
Landslaget for lokalaviser (LLA)
Fagpressen (F)
Norsk Presseforbund (NP)
Norsk Redaktørforening (NR)
Institutt for journalistikk (IJ)
Norsk Journalistlag (NJ)
Norsk Telegrambyrå (NTB).

Etter landsstyrevedtak i Norsk Journalistlag førre veke vart det bestemt at NJ ikkje flyttar inn i «Pressens Hus» med arbeidsplassar - slik som dei andre organisasjonane – men ynskjer å bidra i ein fellesdel.