I kommentaren «Mafiametoder i fjellheimen» onsdag kveld skriv TA-redaktør Ove Mellingen om sin journalist som vart beden til eit nyoppussa hotell av direktør og hovudeigar. Journalisten førebur mellom anna kritiske spørsmål. Han har i tillegg skrive kritisk om hovudeigar tidlegare.
Dette var ein laurdag. Journalisten var tilbode gratis overnatting, men takka nei. Rett nok overnatta han på hotellet, men bad om å få rekning tilsendt Telemarksavisa. Journalisten gjorde sine intervju, tok bilete, men var òg med på mat, og drakk, ifølgje TA, fire øl i tidsrommet 18:00 til over midnatt. Etter arbeidstid.
Det som skjedde i dagane etter, kort summert opp, er dette, ifølgje TA-redaktøren:
- Hotelldirektøren ringjer Mellingen og seier han er usikker på om reportasjen som kom var positiv nok. I tillegg var han uroa for at TA-journalisten hadde fyllekøyrd heim dagen etter.
- Fleire i hotelleinga tok mange bilete i skjul av TA-journalisten. Desse bileta skal Mellingen ha fått tilsend.
- Hotelldirektøren ringde òg konkurrenten Varden og tipsa om at TA-journalisten skal ha fyllekøyrd dagen etter.
«Det har vært et voldsomt aktvitetsnivå fra folkene som inviterte vår journalist på middag og et glass», skriv Mellingen.
«På vegne av TA kan jeg si det at vi har hundre prosent tillit til vår journalist. Jeg har kjent ham i over 20 år. Ikke én gang har han hatt problemer av denne typen», skriv han vidare.
Medier24 har fått stadfesta frå Varden at dei vart kontakta av ein person som dei i utgangspunktet opplevde ville ha råd om korleis dei skulle handtere det. Etter kvart opplevde dei at personen ville at Varden skulle omtale det redaksjonelt.
Set-up
Overfor Medier24 utdjupar Mellingen:
– Grunnen til at eg skriv det er at me trur det er ein setup – fordi me har vore kritiske til det miljøet, og eit par av aktørar i det miljøet, over lang tid.
– Set-up-en blir så openberr, og så forsøker dei å bruke kor mange øl han hadde drukke, og fyllekøyring, for å diskreditere vår mann. Det er ganske alvorleg, seier han.
Han legg til:
– Eg har vore redaktør i 20 år og aldri opplevd noko liknande.
– Skuldingane er grove og totalt feilaktige
Medier24 har vore i kontakt med hotelldirektøren, som skriv følgjande i eit svar på e-post:
«Vi fastholder vår versjon og synes disse beskyldning er grove og totalt feilaktige, og liker dårlig disse beskyldninger vi ser i TA idag.
Her har nok både vi, den berørte journalisten og TA lært mye. Vi vil beklage hele saken og legge denne bak oss.
Ut over dette har vi ingen kommentarer»
Mellingen er nøgd med at dei involverte orsakar hendinga, men på spørsmål om kva TA har lærd svarar han slik:
– Det er to ting. Ei påminning om kor viktig kjeldekritikk er, og så er det ei stadfesting av at ein må vere varsame om at ikkje alle vil ein vel.
– Eg registrerer at dei beklagar saka. Det høyrast fornuftig ut.
– Tvilsame forretningsmetodar
Mellingen seier til Medier24 det ikkje «var noko som skurra» på førehand då TA tok imot invitasjonen, og at dei tykkjer det er interessant å fortelje om hotell som satsar.
– Men samstundes så gjorde han grundig førearbeid og fant ein god del betalingsmerknader og økonomiske problem, seier han.
– Me skriv kritisk om folk som driv med, etter vår oppfatning, tvilsame forretningsmetodar, legg han til.
I kommentarartikkelen har Mellingen vald å publisere eit bilete av journalisten, med to sladda personar, på kvar si side. Eit anna bilete syner ein mann på veg inn i ein bil. Begge bilete utan bilettekst, og berre journalisten er identifisert.
– Me valde å anonymisere. Noko av dette går på kva me trur er deira motiv. Å setje seg inn i andre sine folk sine motiv er krevjande, så me fortel hendingsgangen og antek deler av motivet. For oss er det utydeleg kor aktiv dei to sladda er. Derfor er det riktig å ikkje identifisere dei, seier han.
– Men kvifor ingen bilettekstar? Ein kan tru at han som er identifisert er hotelleigar, ikkje journalisten.
– Han (journalisten) er ein kjent figur som har drive kritisk næringslivsjournalistikk i mange år. Han var i DN før han kom til TA. Me valde å gjere det slik, litt for det dramaturgiske òg, seier Mellingen.
– Må vere varsam med alkohol
Mellingen er tydeleg på at hans journalist ikkje har gjort noko gale. Han meiner det bør vere greitt å ta seg ei øl etter arbeidstid.
– Ein skal alltid vere forsiktig. Alkohol er bra det, men er ein ikkje varsam er det ikkje bra. Det har han vore i dette tilfelle, og han har ikkje gjort noko gale. Det må vere greitt å ta seg nokre øl etter du er ferdig å jobbe, så han har ikkje gjort noko som helst gale, seier han, og legg til:
– Generelt må ein alltid vere varsame med alkohol. Dei prøvde å konstruere ein historie.
