– Eg har gjort nokre formelle feil, og vil ta konsekvensane av det.
Det seier mannen i 50-åra, som er tiltalt for brot på bokføringslova og skattesvik-paragrafen og må møta i Oslo tingrett onsdag og torsdag, til Medier24.
Statsadvokaten meiner mannen har brote straffelova paragraf 378, om skatteunndraging, ved å ikkje levera skattemelding i 2016, 2017 og 2018 – og i staden godtok den førehandsutfylte skattemeldinga utan å gjera korrigeringar.
I ein treårsperiode frå 2014 til 2017 unnlét han i tillegg å føra, eller førte ufullstendig, rekneskap for sitt selskap.
Statsadvokaten vurderer sistnemnde brot som grovt fordi det har skjedd over ein lang periode, verksemda har eit stort omfang og fordi lovbrotet har gjort det vanskeleg for offentlege myndigheiter å ha kontroll med verksemda.
Det har ført til ei samla skatteunndraging på 243.128 kroner, ifølgje tiltalen.
«Han forstod eller burde ha forstått at det kunne føre til skattemessige fordeler», står det i tiltalen.
– Eg håpar utfallet blir at eg får ei bot, fordi eg har gjort dei feila. Eg trudde eg hadde gjort det riktig, seier den tiltalte til Medier24.
Brot på bestemmingane har ei strafferamme på bot eller fengsel inntil to år.
– Eg ynskjer ikkje å komma med påstand per telefon. Først må eg sjå bevisførsel, forklaring og vitnefråsegn, seier politiadvokat Anne Line Grøstad til Medier24.
