Medieprofil dømt til 30 dagar ubetinga fengsel for skattesvik

Mannen i 50-åra er dømt for grovt aktlaust skattesvik og mangelfull bokføring.

Publisert 09.03.2020 - 15:04

Denne artikkelen er over to år gammel.

I ein fersk dom frå Oslo tingrett kjem det fram at mediekonsulenten i 50-åra er dømt til 30 dagar fengsel for mangelfull bokføring i selskapet sitt, og for tre forsettlege og to grovt uaktsamme tilfelle av skattesvik, på totalt 243.128 kroner.

Han er også dømt til å betala sakskostnadane på 5.000 kroner.

Mannen var tiltalt for brot på straffelova paragraf 378, om skattesvik, ved å ikkje levera skattemelding i 2016, 2017 og 2018 – og i staden godtok den førehandsutfylte skattemeldinga utan å gjera korrigeringar.

No vil Oslo tingrett i tillegg ha han dømt for brot på paragraf 380, om grovt aktlaust skattesvik.

Retten dømmer han også for brot på bokføringslova etter at han i ein treårsperiode frå 2014 til 2017 unnlét å føra, eller førte ufullstendig, rekneskap for sitt selskap.

Tiltalte erkjenner dei faktiske forhold, og jobbar med å betala tilbake skuldige skattebeløp.

Brota på plikta til løpande bokføring ser retten på som «relativt alvorlige straffbare forhold», står det i dommen. Retten viser til at brota skjedde i ein relativt langvarig periode, der omsetnaden i verksemda var betydeleg.

Vidare står det i dommen:

«Retten mener (…) at det ikke er holdepunkter for at tiltaltes overtredelser har sammenheng med et planmessig ønske om å unndra seg skatt og avgifter. Samtidig mener retten at den manglende kontrollen med regnskapene henger sammen med at tiltalte også domfelles for skattesvik.»

Påtalemakta skreiv i sin tiltale at mannen forstod eller burde ha forstått at brota kunne føra til skattemessige fordeler. Sjølv sa han til Medier24 at han trudde han hadde gjort alt rett.

– Eg håpar utfallet blir at eg får ei bot, fordi eg har gjort dei feila. Eg trudde eg hadde gjort det riktig, sa mannen i 50-åra til Medier24 i februar.

Den tiltalte har ikkje teke stilling til om han skal anka saka. Han har heller ikkje nytta høvet til å kommentera saka på noverande tidspunkt.