Her bryt Nettavisen god presseskikk, ifølgje professor. Teknisk feil, svarar avisa

Tysdag og onsdag kunne ein ved fleire høve sjå Nettavisen sine reklameartiklar, umerka, i nyheitsfeeden øvst på framsida.

– Dette er opplagt ikkje merka, og det skal det jo utvilsamt vera, seier instituttleiar Steen Steensen ved OsloMet til Medier24.

Han legg til:

– Dette er eit brot på presseskikken som seier at annonsar skal vera tydeleg merka. Det gjeld tilvisingstekstar på framsida også. Og det må jo dette oppfattast som.

Nyheitsredaktør René Svendsen seier til Medier24 at det er ein teknisk feil som har ført til at annonseartiklane hamnar i nyheitsfeeden.

– Dette er meld inn som teknisk feil frå oss i redaksjonen. Det skal altså ikkje ligga der, seier han til Medier24.

Dei oppdaga feilen i dag føremiddag, etter at saka «Black friday-salg: Sokkene som gjør deg glade» vart lagt ut klokka 10.55.

– Me oppdaga det ganske kort tid etter den saka kom ut, seier Svendsen.

Også saka «Black friday: Dette er kuppet vi er sikker på at blir utsolgt» vart lagt ut i nyheitsfeeden tysdag kveld.

– Veit du kva som har skjedd?

– Nei, ikkje reint teknisk. Eg har berre gitt beskjed, og fått tilbakemelding om at dette er ein feil.

– Er du samd i at det er i strid med god presseskikk?

– Det er ein feil, og skulle ikkje ha vore der, så eg har ikkje noko meining om det.