NTB-sjefen ser svært alvorleg på trakasseringsfunn. Oppmodar tilsette til å varsle

Sjefredaktør i NTB, Mads Yngve Storvik, er ærleg på at organisasjonen har ein jobb å gjere. Klubbleiar er ikkje veldig overraska, seier ho til Medier24.

Ole Alexander Saue

Publisert 03.12.2018 - 14:44

Denne artikkelen er over to år gammel.

– Me skal ikkje feie noko under teppet. Dette skal fram i dagens lys, seier Mads Yngve Storvik i NTB til Medier24.

Måndag kunne NRK avsløre at ei internundersøking i NTB viser at 13 av 108 respondentar har opplevd trakassering i løpet av det siste året.

Førebels er det lite informasjon om kven og kva trakasseringa går ut på. Mads Yngve Storvik i NTB tek likevel svært alvorleg på funnet, og vil undersøke det ytterlegare.

– 13 er 13 for mange

På spørsmålet: «Har du i løpet av det siste året opplevd å bli utsett for mobbing eller trakassering?» har 13 av 108 respondentar svart alternativ 1 eller 2 (frå 1-5, der 1 er sterkast). Totalt 112 svarte på undersøkinga, medan fire valte å ikkje svare på nemnte spørsmål.

– Det seier ikkje noko meir om kva det går ut på. Eg hadde eit allmøte i slutten av førre veke, der me gjekk gjennom det. Me ser svært alvorleg på det, seier Storvik.

Bakgrunn: Flere NTB-ansatte melder om trakassering og mobbing

No oppfordrar han tilsette til å varsle om konkrete hendingar.

– Me har oppfordra til at ein må varsle i samsvar med rutinane me har, dersom det er grunnlag for det, seier han.

Storvik presiserer at dei ikkje har teke imot varslar som indikerer at NTB har store problem knyt til trakassering.

– Eg reagerte med tanken om at 13 er 13 for mange. Det kan ein ikkje vere nøgd med. Ein må finne ut kva som er bakgrunnen for dette, seier han.

Klubbleiar: – Ikkje overraska

Klubbleiar i NTB, Grethe Brandsø, ynskjer ikkje å seie stort når Medier24 ringjer, men vedgår følgjande:

– Eg er ikkje veldig overraska, nei.

– Korleis reagerte du på tala?

– Slik skal det ikkje vere. Utover det er det ikkje så konstruktivt av meg å ta det eksternt. Eg vil at dette skal vere ein god stad for alle, og eg har tillit til at Storvik, saman med tillitsvalde, ryddar opp, seier ho.

Møter med fagforeining og verneombod

Ifølgje redaktøren er det #metoo-kampanjen som har skylt gjennom verda det siste året, og felt både politikarar og redaktørar for seksuell trakassering, som gjorde at dei valte å ta med spørsmålet på undersøkinga.

– Me køyrer ei årleg medarbeidarundersøking med om lag 50 spørsmål, kor ein tek temperaturen på organisasjonen, om ein trivs på jobb og om ein har interessante oppgåver og så vidare, seier han.

Tysdag skal dei ha møte med fagforeining og verneombod for å bli einige om korleis dei skal kome til botns i funnet.

– Vart de overraska?

– Det kom overraskande på i den forstand at me ikkje har fått noko tilbakemelding på at nokon er direkte mobba, seier han.