Sogn Avis opplevde i 2018 ein resultatauke før skatt på 2,4 millionar kroner til 2,2 millionar kroner. Det gir ein driftsmargin på 4,4 prosent.
Avisa, som held til i Leikanger i Sogn og Fjordane, har 24 tilsette, og leverer stadig fem papirutgåver i veka til sine om lag 7.000 papirabonnentar. Ytterlegare 1.500 abonnerer digitalt.
– Me har ikkje flagga den digitale satsinga like hardt som andre, og me har hovudfokus på papir. Me følgjer med digitalt, men me publiserer først og fremst for papir, seier dagleg leiar Leif Johannes Lunde i Sogn Avis til Medier24.
Saka held fram under tabellen.
| Sogn Avis | 2018 | 2017 | Endring |
| Omsetning | 41,6 mill. | 42,5 mill. | -2.3% |
| Driftsresultat | 1,8 mill. | 1,7 mill. | 7.5 % |
| Resultat før skatt | 2,4 mill. | 2,2 mill. | 10.3 % |
| | | | |
| Driftsmargin | 4.4 % | 4.0 % | 10.0 % |
No lagar dei først og fremst papiravisa, og oppdaterer den digitale litt seinare, ifølgje Sunde.
– Er det berekraftig i 2019?
– Nei. Iallfall ikkje i 2020.
No kan nemleg avisa bli tvungen over på verdsvevet. For å førebu seg på frekvenskutt som følgje av endring i postlova, skal Sogn Avis i sommar forsøke seg på tre utgåver i veka i seks veker.
– Me fryktar postlova som vart endra på Stortinget i juni. Det vil gå kraftig ut over oss i Sogn, og tvingar oss til å redusere til tre utgåver. Me veit ikkje korleis det vil bli heilt enno, så difor har me testmånaden for å sjå korleis me kan rigge oss til framtida, seier Lunde.
Lesarane er allereie informert, men dei sterke reaksjonane har stort sett ikkje kome, seier han.
– Då må me ha litt meir innhald på nettversjonen, slik at folk brukar det litt meir enn dei gjer i dag. No har me 70.000 sidevisningar og 11.000 unike brukar dagleg, seier han.
Og held fram:
– Me seier me er dårlege digitalt, men me er langt frå dårlege. Men potensialet er større, seier han.
Om 2018 seier Lunde at overskotet var som budsjettert med, og at annonseinntektene er lik som resten av landet. I tillegg er betalingsviljen på veg opp, fortel han.
– Men trenden er litt treigare digitalt enn i andre aviser, seier han.
Sogn Avis hadde i fjor 24 årsverk, står det i rekneskapen.
