I fjor var han ord­førar. No blir Peder Sjo Slettebø journalist i Kvinn­heringen

Frå 2015 til 2019 var tidlegare bakar Peder Sjo Slettebø (H) ordførar i Kvinnherad kommune. Ein knapp månad før valet trakk han seg frå vervet etter strid med varaordføraren, men har sidan hatt plass i kommunestyret i sunnhordlandskommunen.

Son av lokal satirikar

No trekk Høgre-politikaren seg ut frå politikken og blir journalist, skriv Kvinnheringen sjølv onsdag kveld.

– Dette er noko eg har tenkt på og har hatt lyst til sidan eg var liten. Det byrja med at eg har to foreldre med bakgrunn i media. Nyheiter, aktualitet, presseetikk og -metodar var noko me snakka om rundt middagsbordet, og som gjorde meg tidleg interesser, seier Sjo Slettebø til Medier24.

Mor Ingvild Slettebø er journalist i Bømlo-Nytt, medan far Lars Slettebø er kjent for den vekevise satireavisa «Taakeluren» i Sunnhordland.

No blir han altså ein del av mediebransjen sjølv. 

– Eg byrja å lesa lokalavisene då eg var liten – først bilete, og då eg lærte meg å lesa gjekk eg laus på teksten. Lokalaviser og aviser har vore ein viktig del av interessa og livet mitt, så når eg ikkje er ordførar lenger har eg eit samfunnsengasjement eg vil vidareføra – i ei heilt anna rolle og på ein annan måte, seier han.

Slettebø har vore sjukemeld sidan i fjor sommar, og har ikkje delteke i politiske møte sidan. No sender han søknad til kommunestyret for å bli friteken frå alle verv, skriv Kvinnheringen.

Karantene på politikk

Redaktør Mona Grønningen i Kvinnheringen er førebudd på reaksjonar, men har tru på at Slettebø vil gjera jobben på ein profesjonell måte.

– Me er veldig klar over problematikken med habilitet, så dette må ein vera klar over heile tida. Også ein tidlegare ordførar må passa seg, og vera objektiv og nøytral. Det har me inntrykk av at han har fokus på og tenkt over, seier Grønningen.

Slettebø får karantene på politikk ut året.

– Det er mykje i eit lokalsamfunn som kan relaterast til politikk, men saker om bustad, næringsliv, kultur – og no koronasmitte – er ikkje like politisk, seier ho.

– Korleis har de vurdert hans bakgrunn når de tilsette han?

 – Peder har veldig mykje erfaring frå andre sida av bordet. Han har blitt stilt mange kritiske spørsmål sjølv, og har ikkje berre god erfaring med pressa, oss til dømes, men me har inntrykk av at han har god kontroll på korleis me jobbar, seier ho.

– At han har vore ordførar kan ikkje gi han yrkesforbod, og han har overtydd oss om at han verkeleg vil dette, og trekk seg frå politikken. Så håpar me at lesarane stolar på at me har teke dei naudsynte vurderingane, legg Grønningen til.

– Nokon vil sitja med lupe

Kvinnheringen skreiv om tilsetjinga onsdag kveld, og har so langt ikkje fått éi negativ tilbakemelding, seier ho.

– Men me er førebudd på at det kan koma reaksjonar, til dømes frå politikarar.

Vidare presiserer ho at han vil få tett oppfølging og opplæring i presseetikk og -metodar.

– Korleis trur de lesarane vill oppfatta sakene hans?

– Eg trur dei fleste av våre lesarar er oppegåande, men nokon kjem til å sitja med lupe, og difor må me vera medvitne. Det krev ein grundigare jobb for oss, på kort og lang sikt. Me må vera påpasseleg om alt anna han skriv om, og det må me følgja tett, seier ho.

Det høyrer med til historia at tidlegare Kvinnheringen-redaktør Tomas Bruvik, som gjekk av i fjor sommar, fekk kritikk for hans nære venskap med Sjo Slettebø. Spesielt hans ferieturar med den dåverande ordføraren vakte debatt lokalt.

Han presiserte overfor Medier24 at det ikkje var habilitetsproblem som gjorde han slutta i jobben, men skreiv følgjande i eit avskjedsbrev på Facebook:

«Ein har aldri fri, sjølv om ein har fri. Det skal no bli fint å sleppa akkurat det, og ikkje minst kunne reisa på tur med gode og dårlege vener, utan at andre har meiningar om kven eg er på tur med. Det kjennest bra.»

– Blir av og til irritert på pressa

Sjølv tykkjer Slettebø det er ryddig å gi han karantene på saker om politikk.

– Korleis skal du klara å halda deg nøytral som journalist?

– Det er mange som går frå politikk og over i andre yrke, til dømes media. Nøkkelordet der er rolleforståing. Ein vil alltid ha ei meining om saker, men det er måten sakene vert framstilt på som er avgjerande. Eg har stor respekt for den journalistiske integriteten og vil jobba hardt for å oppnå den same integriteten. Eg må berre be om ein sjanse for å bevisa at eg vil klara det, seier han.

– Som ordførar har eg erfaring med å fremja synspunkt og saker eg ikkje er samd i. Der har eg lært å vera objektiv til saker og meiningar, seier han.

– Kva erfaring har du sjølv med pressa?

– Mi erfaring er at pressa er ein viktig del av demokratiet, og eg opplever lokalavisene våre veldig profesjonelle og ryddige, seier han

Og legg til:

– Når du sit i ein maktposisjon blir du av og til irritert på lokalavisa, men om ikkje hadde dei ikkje gjort jobben sin. Eg tykkjer det som dreier seg om presseetikk er spanande, og me har ei norsk presse som er svært medviten dette, seier han.

– Og korleis har reaksjonane vore?

– Eg vil tru nokon tykkjer det er spesielt då dei er vant til at eg er politikar, men reaksjonane so langt er positive.