Kvar fjerde nordmann tok VG sin valgomat: – Veldig nøgd

Heile 1.253.895 nordmenn har gjennomført VG sin valgomat frå då den først vart rulla ut i juli fram til kommunevalet 10. september førre veke.

Med 5.345.599 innbyggjarar i Norge utgjer det 23,4 prosent av befolkninga.

– Det er me veldig nøgd med. Det var eit mål for oss å laga ein som dekkja heile landet. Det gjer at folk kan komma til VG og likevel få dekning av lokale problemstillingar, seier nyheitssjef Eva-Therese Loo Grøttum i VG til Medier24.

12.120 kandidatar

Aldri før har VG satsa tyngre på valgomaten enn i år. I sommar skreiv Medier24 om Jari Bakken og Oda Leraan Skjetne som har jobba fulltid med valgomaten sidan april. I arbeidet ligg det heile 12.120 lokale kandidatar og 867 ulike spørsmål.

– Det er gjort ein enorm jobb, så dei som har laga den skal ha all mogleg ros og ære, seier Loo Grøttum til Medier24.

Inspirasjon frå Danmark

Initiativtakar bak valgomaten er utviklar Øyvind Engan. Også nyheitssjef Andreas Nilsen har bidrege med utforming av spørsmål.

Nytt for denne utgåva av valgomaten var at brukarane fekk opp både lokale kandidatar og parti.

– Dette var eit heilt nytt grep. Me henta inspirasjon frå Danmark.

– Var det gitt at alt arbeidet skulle betala seg så godt?

– Nei, det kan ein jo ikkje vita. Me visste at dansk TV 2 hadde hatt suksess, men det er skilnad på Danmark og Norge – då me har fleire kommunar.

9,4 millionar visingar

No har dei store planar for stortingsvalet i 2021.

– Eg kan seia så mykje som at me tenkjer tankar allereie no. Me har ikkje bestemt oss korleis me løyser det endå, då det er litt annleis enn lokalvalet. Men me tenk heilt klart lærdom med oss frå årets valgomat.

Totalt har valgomaten 9,4 millionar sidevisingar – inkludert dei internt i valgomaten.