Ferske rekneskapstal for P4-gruppen viser at det NENT-eigde radioselskapet fekk eit resultat før skatt på 78,7 millionar kroner, ned frå 92,5 millionar kroner året før.
Samla mista dei to selskapa P4 Radio Hele Norge og P5 Radio Halve Norge heile 52,7 millionar kroner av omsetnaden frå året før. Administrerande direktør i P4, Kenneth Andresen, forklarar nedgangen slik:
– Me trakk oss heilt ut av lokalradiomarknaden i Oslo, i tillegg til at me, i likskap med alle andre tradisjonelle medium som avis og tv, opplevde ein noko svakare marknad i 2018 enn året før.
– Me har gjennom dei siste åra gradvis trekt oss ut av dei lokale reklamemarknadane i dei fire store byane og dette gjer at betydelege inntekter frå lokalradioreklame vert borte.
P4-gruppen
2018
2017
Endring
Omsetnad
366,1 mill.
418,8 mill.
-12.6%
Driftsresultat
77,1 mill.
93,3 mill.
-17.4%
Resultat før skatt
78,7 mill.
92,5 mill.
-15.0%
Driftsmargin
21.1%
22.3%
-5.5%
– DAB-omlegging kan ha spelt inn
Selskapet oppnår likevel bunnsolide resultat med driftsmarginar på over 20 prosent to år på rad. I 2018 ved hjelp av kostnadskutt.
– Til gjengjeld falt ein del kostnadar knytt til dobbeltdistribusjon, konsesjonsavgifter og digitalisering bort. Det gjer at me leverer eit resultat på dryge 78 millionar kroner på radioverksemda sett under eitt, seier Andresen.
P4-sjef Kenneth Andresen.Erik Waatland
Medier24 skreiv i november i fjor at P4 legg ned P5 sine lokalsendingar i Bergen.
– Kor stor påverknad har DAB-omlegginga hatt på inntektsfallet?
– Me ser ikkje på det som blant dei største forklaringsvariablane. Det kan ha spelt inn, men dei viktige forklaringane er at me trakk oss frå lokalradiomarknaden og ein generelt noko svakare marknad.
Som grafen over viser, har P4 levert levert resultat før skatt på over 50 millionar kroner kvart år sidan 2006. Årets omsetnad er likevel det lågaste sidan 2011.
P4-sjef Andresen vil ikkje kommentere året so langt, men meiner det er mykje å glede seg over.
– Positive teikn i tida
– Me har opplevd sterk lyttarvekst for radio i 2019 og me held oppe veldig solide marknadsandelar for kanalane i P4-gruppa.
Ifølgje Andresen er det over 1,2 millionar nordmenn som høyrer på radiokanalane deira kvar dag.
Radioverksemda deira består no av P4 Radio Hele Norge, P5 Hits, P6 Rock, P7 Klem, P8 Pop, P9 Retro, P10 Country, NRJ Norge, i tillegg til nettkanalen P11 Bandit.
– Dei aller fleste norske mediebedriftene opplever stadig ein krevjande marknad, men eg er veldig optimistisk og tykkjer eg ser positive teikn i tida, seier han.
Vidare trur han på ein oppsving for radiokanalane framover.
– Radio, og audio generelt, er på ein global opptur og har vore ein vekstvinnar i både Sverige og Storbritannia gjennom 2018 og -19. Mykje tyder på at annonsørane vil gi dei tradisjonelle og veldokumenterte massemediekanalane ein større plass i mediemiksen framover, og at det einsidige fokuset på «performance marketing» er i ferd med å nyanserast, seier Andresen.
