Til venstre er skjermdump av The Guardian-saka med bilete av Helga Hjorth. Til høgre er tidlegare Universitas-fotograf Guro Sommer Værland.

Skjermdump/Pernille Sandberg

The Guardian legg seg flate etter å ha brukt Universitas-bilete utan løyve

Den britiske storavisa har lovd å gjera opp for seg. – Så får me sjå kor mykje saft det er i denne sitronen, seier fotograf Guro Sommer Værland.

Ole Alexander Saue

Publisert 09.01.2020 - 05:55

Denne artikkelen er over to år gammel.

Laurdag publiserte The Guardian eit lengre intervju med den norske forfattaren Vigdis Hjorth. I saka hadde dei også med eit bilete av hennar søster – jurist og forfattar Helga Hjorth.

Problemet var berre at biletet var henta frå studentavisa Universitas, og brukt – utan å verken spørja avisa eller frilansfotograf Guro Sommer Værland om lov.

– Eg tykkjer det er veldig rart, seier ho til Medier24, og legg til:

– Det er jo ei moglegheit for meg at namnet mitt dukkar opp i ei så stor avis, men så krediterer dei ikkje med namn. Eg har litt blanda kjensler, då det er litt komisk, men dei har jo ikkje rett til å ta kva som helst.

Slik forklarar avisa det

Ho sa tysdag at ho skulle fakturera avisa. Då Medier24 tek kontakt med The Guardian for ei forklaring, legg dei seg flate.

Først kjem svaret frå fotoredaktør Anthony Bell i The Guardian si søsteravis, The Observer. Dersom dei skulle bruka det, ville han be om lov, forklarar han. Han beklagar feilen, og seier at dei ikkje brukte biletet i papirutgåva grunna plassmangel, men at det ikkje vart sletta frå databasen digitalt. Dermed vart det lasta opp i artikkelen av ein kollega på desken.

Han tek skulda, og seier at han vil ta kontakt med Sommer Værland for å gjera opp for seg.

– Glad me har dialog

Kort tid tikkar det inn ein ny e-post, denne gong frå pressekontoret til The Guardian, som heller ber oss sitera ein ikkje namngjeven talsperson for avisa på følgjande:

«Me beklagar feilen og kan stadfesta at me har tilbode betaling til både fotografen og avisa.»

Sommer Værland stadfestar at avisa har teke kontakt.

– Han legg seg flat og har tilbode meg kompensasjon for publisering. Denne summen er likevel under frilanssatsen i Norge, seier ho.

– Eg kjem til å svara Anthony i løpet av morgondagen og er glad for at me har ein dialog. Det verkar som dette ordnar seg, så får me sjå kor mykje saft det er i denne sitronen, legg ho til.