– Svært dårleg forslag, seier Raymond Johansen om å flytte NRK til Trondheim

Medier24-redaktør Erik Waatland skreiv førre veke i ein kommentar at han meiner NRK bør vurdere flytting til teknologihovudstaden Trondheim.

Artikkelen skapte stor debatt i sosiale medium, og Bergensavisen, Teknisk Ukeblad, og Nordlys har alle på kommentator- eller leiarplass støtta forslaget. Også NTNU-rektor, Gunnar Bovim, skreiv på Twitter at han tykte det var eit «spenstig forslag».

– Oslo er landets hovudstad!

Overfor Medier24 utdjupar han:

– I utgangspunktet skal eg erkjenne at det ikkje er realistisk, men eg tykkjer me kan vurdere å sjå kva ein bør leggje til Trondheim, og i kva omfang me gjer det.

– Når NRK skal digitaliserast er det store miljø i Trondheim med utdanning- og forskingsmiljø. Korleis fordeler ein redaksjonelle kompetanse og kapasitet? Det er klart at med TV 2 i Bergen og NRKs nest største kontor i Trondheim tykkjer eg det er interessant om NRK ser på arbeidsfordelinga, legg han til.

Byrådsleiar i Oslo, Raymond Johansen (Ap), er svært negativ til forslaget og meiner NRK sitt hovudkontor ikkje høyrer heime andre stader enn i hovudstaden.

– Det er eit svært dårleg forslag, seier han, og utdjupar:

– NRK er landets viktigaste nyheitsformidlar. Dei har flater på radio, tv og nett og set dagsorden for nasjonale nyheiter. Då meiner eg det er svært viktig å vere nær sentrale nyheitskjelder, Stortinget, regjeringsapparatet, kultur, næringslivet, idrett og mange av dei oppgåvene som er knyt til Oslo. I tillegg er Oslo landets hovudstad.

– Potensial for ytterlegare styrking

Distriktsdirektør i NRK Midt, Sigrid Gjellan, tykkjer det er eit «friskt utspel og artig tanke», men er tydeleg på at NRK allereie i dag har er gode både regionalt og lokalt – utanfor Oslo.

– Det viktigaste er at me har redaksjonelle miljø rundt i landet. Me har mange NRK-tilsette rundt i landet. Det er ikkje slik at toppleiinga i NRK ikkje kjenner verksemda og synspunkta i landa. Thor-Gjermund Eriksen og distriktsredaktør er flinke til å reise rundt. At det er ein styrke for NRK å vere sterke i andre deler av landet, og ekstra sterke i Trondheim, Bergen eller Tromsø, er veldig viktige bein for NRK, seier ho.

– Men det er veldig, veldig artig at Trondheim vert trekt fram av Medier24. Det viser at ein ser det er sterke miljø andre stader i landa, og at det er potensial for ytterlegare styrking, legg ho til.

Dette seier kringkastingssjefen

NRK har allereie vedteke å flytte hovudkontoret frå Marienlyst, men ikkje kvar eller når. Kringkastingssjef Thor-Gjermund Eriksen har både Oslo, Lillestrøm og Bærum på blokka, og skriv følgjande i ein sms til Medier24:

«Vi har konsentrert oss om Marienlyst-området for å sikre at vi faktisk har finansiering til å flytte. Derfor har jeg til nå ikke uttalt meg om hvor NRK bør flytte. Først må vi være sikre på at vi kan og skal flytte. Til nå har jeg hørt ca 20 forslag til hvor NRK bør flytte. En saksopplysning: ca 1/3 av NRKs tilsette er utanfor Oslo. Vi har ganske stor verksemd i Karasjok, Tromsø, Trondheim og Bergen. I tillegg til distriktskontor i fylka.»

I desember inngjekk NRK i Trondheim og NTNU ein intensjonsavtale om samlokalisering, ifølgje Adresseavisen. Waatland trekk fram kompetansemiljø som både NTNU og Sintef som gode grunnar for å vurdere ei flytting. NTNU-redaktør Bovim meiner ei samlokalisering mellom NRK og NTNU vil vere ein «vinn-vinn»-situasjon.

– Me ser mange ubrukte synergieffektar ved å leggje ut meir aktivitet enn me gjer i dag. Me ynskjer det velkomen til trondheimsmiljøet i og med at TV 2 er i Bergen, seier Bovim.

Gjellan legg til:

– Ambisjonen med samlokalisering hos NTNU er eit tett og godt samarbeid om dei fagområda som er relevant og spanande i eit medieperspektiv.

– Dei fleste pratar dialekt

Johansen derimot meiner det ville vore feil å plassere leiinga i ein annan by enn der «hovudtyngda av nyheitsformidlinga er».

– Oslo er Norges minste felles multiplum. Her er både nordlendingar, trønderar, vestlendingar og utlendingar, legg han til.

– Mitt inntrykk er at når eg snakkar med avisredaksjonar i Oslo har alle det til felles er at det er svært få oslofolk. Dei fleste pratar ei dialekt frå ein stad utanfor Oslo, seier Johansen.