VG blir første med norsk innhald på Google-smart­skjerm: – Nytt kommersielt rom

Tysdag slapp nyheita om at Google lanserer «Google Home Hub» (døypt om til Google Nest Hub 7. mai) i Norge 28. mai. Den digitale skjermhøgtalaren liknar smarthøgtalaren Google Home som vart kom til Norge i fjor haust.

Som første norske samarbeidspartnar for den nye smartskjermen, kan du allereie no få korte nyheitsvideoar frå VG om du spør skjermen om å få siste nytt frå avisa.

– Det me tilbyr kallar me eit lyd/skjerm-produkt, seier Ola Stenberg, digitalredaktør i VG, til Medier24.

– Meir enn Google-samarbeid

Lyd/skjerm-videoane fungerer i praksis like godt som video som lyd.

– No er det så mange ulike skjermar me treng innhald for. Nokre dømer er framsida til VG.no, skjermhøgtalarar, offentlege skjermar på gata, t-banestasjonar, tog og fly og kaffimaskinar med skjermar. Det er uendeleg med flater du kan fylle. Me ser på dette på noko meir enn berre eit Google-samarbeid, seier Stenberg vidare.

Då Google Home vart lansert i fjor var VG, Sol.no, NRK og TV 2 tidleg ute å bli med på laget. Ber du smarthøgtalaren om siste nytt, kan du få det frå alle fire.

TV 2 vurderer

På smartskjermen som kjem i slutten av månaden er TV 2 litt avventande.

– Me har vore i dialog med Google, og vurderer det laupande. Vårt utgangspunkt er at me vil vere på dei plattformene folk er på, seier nyheitsredaktør Karianne Solbrække til Medier24.

– Me har ein del anna utvikling me prioriterer først, men som me ikkje vil seie noko om no.

– Det var løyndomsfullt?

– Veldig! Men det er ikkje noko rakettforsking, altså, seier Solbrække.

Under Medieleder 2019-konferansen på Hotel Norge i Bergen onsdag haldt Brenda Salinas Baker i Google føredrag om korleis ein best utviklar nyheiter for Google sine nye smarteiningar.

– Google vil bidra til å distribuere informasjon. Utan journalistikk er det ingen informasjon å organisere, så de har eit sete rundt bordet. Google er tilhengjarar av journalistikk, sa ho.

Ho haldt fram med eit tips til norske mediehus:

– Få ein større «feed» – med meir «innhald». Ikkje berre harde nyheiter, men sport, underhaldning og ting som er relevant.

– Trur me kan tene pengar på det

Stenberg fortel at dei ynskjer å dra nytte av Google si distribusjonskraft, og ser kommersielle moglegheiter i dei nye smarteiningane.

– Google som ein drivar på internett må me utnytte til vår fordel. Me trur dette vil gagne VG på sikt. Posisjonen som størst må me kjempe med nebb og klør for å halda på. Den posisjonen er vår grunnmur, seier Stenberg.

– Betre distribusjonsmoglegheiter er bra for alle som skapar innhald, seier han.

Førebels er det ikkje annonsar inne i biletet, anna enn på testnivå, ifølgje Stenberg.

– Kan de tene pengar der på sikt?

– Eg trur det er mogleg. Lyd på denne måten er eit nytt format. Det opnar eit nytt kommersielt rom. Det er ingen grunn til å tru at det ikkje kan kommersialiserast, men me er ikkje der enno. No handlar det om å skape volum, seier han.

Òg i TV 2 har dei stor tru på smartprodukta.

– Me har i utgangspunktet òg veldig tru på det, men det vert ei avveging mellom mobilen, som alle ber med seg heile tida, og den meir stasjonere Google Hub. Ingen veit om den har kraft nok til å ta store deler av kundemarknaden. Men me trur definitivt det går den vegen, seier Solbrække.

Ifølgje Aftenposten vart det selt heile 150.000 Google Home og Google Home Mini før jul i Norge i fjor. Stenberg erkjenner at det stadig er i tidleg fase.

– Smarthøgtalarane har enno ikkje klart å skape nok volum. Årsaka er logisk: ein er i veldig tidleg fase av «lydrevolusjonen». Om me spolar nokre år fram, vil slike smarthøgtalarar vere integrert i absolutt alt me har rundt oss, og det vil bli det noko av det mest vanlege å snakke til – anten det er til døra eller mobilen din.

– Handlar om posisjonering

Stenberg held fram:

– Det er viktig for oss å vere tidleg på. Det handlar om posisjonering.

Og dei vil mest truleg få konkurranse.

– Utviklinga innanfor journalistikken går på å kombinere bilde, video og tekst i eitt produkt. Det er retninga me jobbar i, men me vel å sjå litt an akkurat når det gjeld det produktet, seier Solbrække.

– De er ikkje redd for at VG rykkjer frå og tek alle nye område før andre får reagert?

– Det er all grunn til å følgje med på VG. Dei er kjempeflinke – ikkje minst på Snapchat. Samstundes er TV 2 eit meir omfattande mediehus. Me har ein sterk hovudkanal, stadig auke på Nyhetskanalen, og har ikkje berre éi plattform, seier ho.

– Eg er ikkje uroa for at me ikkje får posisjonert oss med vårt nyheitsprodukt på sikt. Det er ikkje slik at dette tek av på den norske marknaden før sommarferien. Me kan fint kaste oss på seinare, seier ho.