Til venstre Stord24-redaktør Jonas Sætre, til høgre medeigar og strategipartner Jostein Sydnes.

Stord24.no

Midt under koronakrisa fekk Stord24 pengestøtte frå uventa hald

Får 50.000 kroner frå Google News Initiative. – Dei får jo normalt mykje pepar frå norske redaksjonar, så då er det godt at dei gir litt tilbake.

Publisert 25.05.2020 - 05:55

Denne artikkelen er over to år gammel.

Den vesle lokalavisa på Stord i Sunnhordland får 5.000 dollar, om lag 49.500 norske kroner, av den globale nettgiganten Google, opplyser redaktør Jonas Sætre til Medier24.

Google News Initiative’s Journalism Emergency Relief Fund (JERF) fekk inn over 12.000 søknadar, står det i tildelinga som tikka inn i innboksen til Sætre tysdag.

– For oss som er så små er dette til god hjelp. Det er jo ei månadsløn for halvparten av dei redaksjonelt tilsette. Det er eit hyggjeleg initiativ, seier Sætre til Medier24.

Tapte annonsekroner

Avisa har to redaksjonelt tilsette.

We’ve selected and notified the first recipients for the Journalism Emergency Relief Fund. If you haven't heard back yet, stay tuned. We’re still reviewing applications, and will share further updates with applicants in the coming weeks.
– Google News Initiative (@GoogleNewsInit) May 19, 2020

– Google får jo normalt mykje pepar frå norske redaksjonar, så då er det godt at dei gir litt tilbake for tapte annonsekroner, seier han vidare.

Stord24 er ei tre år gamal heildigital nettavis for Stord og omland. Dei har fått eit opplag på like over 1.000, og er som dei fleste andre norske aviser hardt råka av koronakrisa.

– Me merkar det i all hovudsak ved fallande annonseinntekter. Me har gjort nokre tiltak, som å auka abonnementsprisen frå 99,- til 120,- i månaden. Det bøter litt på skadane. Og så lanserer me i tillegg ein sommarguide for Stord, som me har fått litt annonsørar med på, seier han.

– Tenkte det var urealistisk

Avisa måtte permittera to personar delvis, men er no nesten tilbake fulltalige.

– Er ein like uroa som ein var i mars og april, eller er ein meir optimistiske?

– Eg er litt uroa for sommaren, fordi det er vanlegvis ein tung annonseperiode. Sommaren vert tøft å koma seg gjennom økonomisk, seier han, og legg til:

– Me er framleis i ein oppbyggingsfase, så brukarinntektene vil etter kvart stå for ein større del av kaka. Og så er målet å koma gjennom nålauga for å få pressestøtte, seier han.

På Google sine nettsider heiter det at støtteordninga skal hjelpa små og mellomstore nyheitsorganisasjonar. Blant krava ar å ha vore aktive i 12 månadar, ha minst to redaksjonelle årsverk, og vera retta mot nyheitsformidling.

– Det var eit veldig enkelt skjema å søka på, og eg brukte om lag ti minuttar. Eg tenkte at det var urealistisk å få noko positivt svar, seier Sætre.