TV Haugaland ser raudt etter at RiksTV tvangsflytta lokal-tv-sendingar permanent

At RiksTV bestemte seg for å flytta sendingetida til lokale tv-stasjonar frå det tradisjonsrike 17.30-tidspunktet til 19.00 betyr at magasin- og nyheitssendingane til lokale tv-kanalar på RiksTV vert sende halvannan time etter skjema.

– RiksTV står fram som ein utruleg arrogant aktør som totalt ignorerer både oss og det lokale publikumet, seier dagleg leiar Heine Birkeland i TV Haugaland til Medier24.

Prioriterer Disney Junior

Sidan 2008 har TV Haugaland sendt frå klokka 17.30 på det digitale bakkenettet. Det gjer dei stadig, bortsett frå hos RiksTV, etter at dei mista 700-frekvensen i det digitale bakkenettet til bruk for mobiltelefoni og mobilt breiband.

Då vart dei nøydt til å gjera endringar.

– Me har i dette tidsrommet prioritert Disney Junior og innhald retta mot born, seier Ole Andre Skarbøvik, kommersiell direktør i RiksTV, til Medier24.

RiksTV hadde ifølgje Nasjonal kommunikasjonsmyndighet sin årlege statistikk 11,5 prosent marknadsandelar i 2018.

Også hos TV Vest i Stavanger merkar dei endringane som først vart varsla i eit brev til Mediebedriftenes Landsforening (MBL) i mai, før endringane trådte i kraft i juni.

– Me får stadig mange telefonar frå sjåarar som spør om me har lagt ned, seier redaktør Jørund Kopren i TV Vest til Medier24.

Tek sjølvkritikk

Andre lokal-tv-kanalar som sender på RiksTV er Sunnmøre LIVE, Trønder-TV, TV Agder, TV Nord og TV Øst.

– Det kom med veldig kort forvarsel, og gjennom MBL. Me fekk ikkje noko direkte varsel om at det skulle skje, seier Kopren til Medier24, og legg til:

– Eg trur framgangsmåten kunne vore betre. Me burde fått høve til å førebu RiksTV-sjåarane om at me vart flytta.

Han legg til:

– Det er vanskeleg å spå kva konsekvensar det får. Det vil neste sjåarundersøking seie noko om. Men 17.30 var eit sendemønster sjåarane var vant til, seier Kopren.

RiksTV tek sjølvkritikk på korleis prosessen vart gjennomført.

– Ideelt sett kunne me nok ha varsla noko tidlegare, seier han og legg til at dei likevel står fast ved avgjersla om å gi borna sendetida.

– Lite omsyn til lokal-tv

Den 17. juni sende MBL eit brev til RiksTV via advokat Rune Opsahl ved Advokatfirmaet Wiersholm. I brevet står det at dei meiner forskyvinga er eit brot på RiksTV sin avtale med kringkastarane, og at det er i strid med konsesjonsavtala.

– Generelt meiner me at distributørane tek for lite omsyn til lokal-tv-kanalen, seier Geir Engen i MBL til Medier24.

I svaret, som Medier24 har sett, avviser RiksTV at endringane er i strid med avtalen. MBL går ikkje rettens veg for å få omgjort avgjersla frå distribusjonsselskapet. Engen legg likevel til:

– Med tanke på måten dei prioriterer lokal-tv stiller me spørsmål ved utsegna om at dei ser verdien i norsk kvalitetsinnhald.

Vidare peiker han på at tv-stasjonane no kjem i direkte konkurranse med til dømes Dagsrevyen.

Kopren i TV Vest svarar slik på om det kan bli tøft å konkurrera med NRK sitt nyheitsflaggskip:

– Det er det heilt sikkert, men eg trur det handlar meir om vane. Når dei må bryta opp vanen sin vert me ekstra utsett for at dei vel noko anna. Ikkje berre fordi det er eit anna tidspunkt, men fordi dei må, svarar Kopren.

Beklagar at ikkje alle er nøgd

Skarbøvik kommenterer kritikken frå MBL slik:

– RiksTV har heilt frå oppstarten av vore oppteken av norsk innhald, norsk kultur og det norske språket. Men akkurat i denne vurderinga har me prioritert born sine sjåarvanar og leggjetid. Det meiner me stadig er ei korrekt vurdering.

Han held fram:

– Med dei avgrensingane som eksisterer i bakkenettet meiner me å ha gjort dei tilpassingane som best tek vare på interessene til våre kundar. Samstundes er det berre å beklaga at ikkje alle er nøgd.