VG-klubbleiar om leiinga: – Misnøye kan koma. Det må eg ta høgde for

Onsdag heldt sjefredaktør Gard Steiro, nyheitsredaktør Tora Bakke Håndlykken og styreleiar Torry Pedersen i VG pressekonferanse kor dei la fram evalueringa av si dekning av Trond Giske-saka.

Kvinna på dansevideoen, Sofie (27), sto fram hos TV 2 førre veke og fortalde korleis ho opplevde møte med VG og journalist Lars Joakim Skarvøy. Ho sa òg at ho opplevde møtet med Giske uproblematisk.

– Godt likt sjef

Skarvøy går ut i seks månadar permisjon, medan resten av leiinga i VG vert sitjande. På spørsmål til Thømt Ruud om klubben har tillit til leiinga, svarar han slik:

– Det er ikkje me som gir tillit til våre leiarar.

– Men det er vel noko dei vil ha?

– Gard er ein godt likt sjef, og dei eg har prata med er glad for at han blir.

– Er det uttrykt misnøye overfor deg om måten leiinga har handtert saka?

– Eg har ikkje grunnlag for å seie det no. Det kan hende det kjem. Det må eg ta høgde for, men det vil eventuelt kome i dagane som kjem.

Ifølgje evalueringsrapporten til VG som vart lagt fram onsdag kveld var Thømt Ruud til stades på to møter med Skarvøy og VG-leiinga under granskinga av saka.

I rapporten står det òg:

«I et mediehus som VG er det viktig med en sjefredaktør som har nærhet til journalistene og er tett på journalistikken. Men i dette tilfelle gikk Steiro inn i en operativ rolle som skapte utfordringer for ham også i håndteringen av saken etter publisering, slik det er redegjort for tidligere.»

– Det må du spørje klubben om

I sju dagar var journalist Skarvøy taus om saka, og fekk i samråd med VG-leiinga ikkje uttale seg om saka før rapporten vart utarbeidd. Det har fått fart på spekulasjonane og avisoppslaga, og generalsekretær i Norsk Presseforbund, Elin Floberghagen, var tidleg ute og etterlyste Skarvøy sin versjon.

– Er det nokon i leiinga du meiner har opptredd feil sidan TV 2 publiserte si sak?

– Det har eg ikkje grunnlag for å seie, seier Thømt Ruud.

På pressekonferansen onsdag kveld fekk Steiro ei rekkje spørsmål om det er riktig at han vert sitjande etter ei denne saka. I eit intervju med Medier24 seier han at det ikkje er ytra misnøye mot han.

– Det må du nesten spørje klubben om. Mi oppfatning er at eg har tillit frå redaksjonen, svarar han på spørsmål om han har tillit frå klubben.

– Har nokon i klubben eller leiinga uttrykt misnøye overfor deg?

– Nei.

Tillit frå Torry Pedersen

Styreleiar Torry Pedersen har heile tida vore tydeleg overfor Medier24 på at han har tillit til sjefredaktør Steiro. Det var òg bodskapen onsdag.

– Det er ingen proporsjonal konsekvens om Steiro skal måtte gå av ut frå dette, sa Pedersen på framlegginga. 

Deretter tok Steiro ordet, og var klar på at han ikkje kom til å trekke seg som redaktør. 

– Det har blitt gjort feil og eg har gjort feil, sa han og viste til forslag om tiltak som kan redusere risikoen for feil i framtida.

Fire av ti nordmenn: Nokon må gå

I ei InFact-undersøking gjort for Medier24 måndag svarar 41,5 prosent at dei stolar i svært liten, eller liten, grad på VGs politiske journalistikk.

Same undersøking viser at 40,8 prosent meiner at anten Lars Joakim Skarvøy, Gard Steiro, eller begge, bør forlate VG for å gjenvinne tilliten til mediehuset.