På fem dagar har 65.000 klikka på VG-rapporten: – Ikkje veldig høgt

Den 56 sider lange evalueringsrapporten frå VG som tok føre seg avisa si dekning av dansevideoen med Trond Giske på Bar Vulkan i februar vart breitt omtalt av norske aviser.

På VG sine eigne flater fekk den derimot lunken respons. Sidan onsdag kveld har berre drygt 65.000 brukarar klikka på saka.

– Det er ikkje veldig høgt i VG-samanheng, seier digitalredaktør Ola Stenberg til Medier24 tysdag ettermiddag.

– Viste den godt fram

Rapporten vart høgt prioritert, pusha til app-brukarane med teksten «VGs evaluering av Giske-saken er ferdig. Den presenteres i Akersgata 55 kl. 20.00. VGTV streamer den på vg.no» klokka 19.01 onsdag. Den vart òg vist til på framsida dagen etter.

– Me brukte mykje tid på rapporten, gav den mykje plass på framsida, og me har ikkje på nokon som helst måte forsøkt å gøyme den bort. Me har vist den godt fram, seier Stenberg.

Til samanlikning har saka «Solskjær avslører: – Nesten som en begravelse» over 400.000 klikk sidan den vart publisert måndag kveld. Den best leste måndag har over 500.000.

– Det viser jo at rapporten ikkje er lest av mange, seier Stenberg.

– Hadde du venta at fleire skulle klikk på den?

– Eg har ikkje trudd noko ting, for å vere ærleg, svarar han.

Han legg til at rapporten først og fremst vart gjort for å ettergå den alvorlege feilen dei hadde gjort i arbeidiet med saka. 

Over ein halv million las TV 2s første sak

Medier24 får av TV 2 opplyst at deira første sak med Sofie (27) har blitt lest av over 500.000 personar, med gjennomsnittleg lesetid på 11 minuttar.

Totalt har sakskomplekset gitt TV 2 om lag 1,7 millionar sidevisingar, og saka som kom under pressekonferansen, «Steiro blir værende – Skarvøy tar permisjon» har like over 40.000 sidevisingar. Det er over snittet på tv2.no.

– Sakene om Giske-videoen har totalt sett blitt lest godt på tv2.no. Spesielt den første saka me publiserte. Ei lesetid på 11 minuttar er mykje, og viser at folk les til botnen, seier Karianne Solbrække, nyheitsredaktør i TV 2, til Medier24.

– Interessa blant sjåarane byrja å dale morgonen etter VGs pressekonferanse. Me har dermed òg dempa dekninga vår, og overlate oppfølginga til fagpressa, legg ho til.

Dagen etter VGs framlegging av rapporten og journalist Lars Joakim Skarvøy gav intervju til Medier24 kor han mellom anna sa at han ikkje hadde fabrikkert eit sitat, prioriterte TV 2 saka, med nytt intervju med Sofie, som hovudsak på 21-nyheitene. Det var same dag som justisminister Tor Mikkel Wara annonserte sin avgang.

– Denne dagen hadde me massiv omtale av Wara-saka i alle våre flater. Inkludert som toppsak 18:30, kor Dagsrevyen toppa med Solskjær. Me strever etter fornying av førstesaka i vår hovudsending 21 på TV 2. Dette var første gong Sofie kommenterte Skarvøy sine fråsegn, seier Solbrække om prioriteringane torsdag.

Stor interesse i Aftenposten

Nyheitsredaktør i Aftenposten, Tone Tveøy Strøm-Gundersen, fortel om stor interesse om VG-saka òg blant deira lesarar.

– Me har fått fleire spørsmål om me overdriv dekninga fordi me sjølv er interessert i saka. Me har prøvd å skilje på kva som er interessant for lesarane, og kva som er interessant for oss som samanliknbar redaksjon, seier ho.

Ho ynskjer ikkje å gi ut konkrete lesartal på artiklane deira.

– Det er ganske stor interesse blant lesarane for denne saka. Den handlar ikkje berre isolert om VG, men om journalistikk, tillit til journalistikken, Arbeidarpartiet og Trond Giske, seier ho vidare.

Om sjølve rapporten seier Aftenposten-redaktøren:

– Det kan eg seie at folk brydde seg om. Det var stor interesse for den rapporten.