PR-topp med klar beskjed til VG-styre­leiar Torry Pedersen: – Kom deg heim frå Paris!

Det har storma rundt VG, journalist Lars Joakim Skarvøy og redaktørane Gard Steiro og Tora Håndlykken dei siste dagane.

TV 2 si avsløring om korleis kvinna på den mykje omtalte dansevideoen på Bar Vulkan i februar kjente seg dårleg behandla av VG-journalisten har skapt sjokkbølgjer landet over.

Kvinna på videoen, Sofie (27), meiner Skarvøy har brukt feilaktige sitat, og VG-redaktør Steiro har beklaga saka overfor kvinna og Trond Giske. Det omstridde «så ble det litt mye»-sitatet er fjerna frå artikkelen, og Skarvøy er førebels sett på sidelinja frå journalistisk arbeid.

– Eg er oppriktig lei meg for den opplevinga Sofie har hatt i denne saka, sa Steiro til Medier24 torsdag.

Torsdag kveld kunne Medier24 fortelje at kvinna frå VGs første Giske-avsløring òg følte seg brukt av VG og Lars Joakim Skarvøy då avisa i desember 2017 omtalte ein SMS ho hadde fått av Trond Giske i 2011.

– Vert slept etter vogna

PR-veteran Hans Geelmuyden er ikkje imponert over VG si handtering av saka.

– Dette er ei krisesak for Verdens Gang. Når ein ikkje meistrar krisehandtering, vert ein slept etter vogna. Det skjer med VG no. Dei er ikkje i forkant, men på bakkant heile tida. Krisehandteringa er ganske dårleg, seier Geelmuyden til Medier24.

– Ein annan ting som slår meg i krisesamanhengar er det er viktig at det vert løfta opp på riktig nivå. Det er styreleiar Torry som må handtere dette vidare. Steiro verkar å vere kraftig part i saka. Mange spør seg om han kan bli sitjande, seier han vidare.

– Pedersen er stadig i Paris. Bør han komma seg heim?

– Ja. Han bør komma seg heim no. Under Torry si redaktørtid brukte me alltid å seie at han gjorde VG til «besting» på presseetikk. Han har dermed mykje å bidra med i denne saka, seier han.

Rapport

Torry Pedersen seier til Medier24 fredag at han stadig er i Paris. Han legg vidare til at han fortløpande vert orientert om saka.

– Mi oppgåve er å sørgje for at me får ferdigstilt ein totalgjennomgang av kva som har skjedd og at det arbeidet har fult fokus, seier Pedersen.

– Skal Steiros stilling diskuterast når du kjem heim frå Paris?

– Eg har full tillit til Gard Steiro. Det viktige er å få ferdigstilt ein rapport som skal offentleggjerast, seier han.

– Rapporten skal offentleggjerast?

– Denne saka har me jobba med veldig grundig i ei stund. Slik saka har utvikla seg så er det heilt naudsynt at ein forsøker å framstille saka så grundig som mogleg i offentlegheita, seier han.

– Er det etablert i leiinga at denne rapporten skal offentleggjerast?

– Det er semje om at me må streva etter det, ja, seier han.

Geelmuyden ynskjer ikkje i å spekulere i om Steiro bør forlate jobben. Han tykkjer vidare at det har blitt eit sterkt personfokus på Lars Joakim Skarvøy.

– Det handlar ikkje om journalisten, men om Gard Steiro, og det må styret ta stilling i, seier Geelmuyden.

Det enorme trykket på VG-leiinga har gjort at digitalredaktør Ola Stenberg tek på seg jobben å koordinere alle medieførespurnadane som kjem til VG.

Samanliknar med Listhaug-saka i fjor

Høgskulelektor i PR ved Høyskolen Kristiania, Ketil Raknes, dreg parallellar mellom Steiro si handtering og Sylvi Listhaug si handtering av den famøse Facebook-posten som kosta ho jobben som justisminister for eit drygt år sidan.

– Først sa ho at ho ikkje angra, så sa ho at det kanskje kunne såre nokon, men at ho ikkje var lei seg. Deretter sa ho at det kanskje ikkje var så klokt. Til slutt beklaga ho innhaldet, seier Raknes til Medier24.

– Det er litt same dynamikk. Over lang tid har VG gått frå å forsvare den 100 prosent til å beklage den heilt, legg han til.

Medier24 har fredag forsøkt å få svar på ei lang rekkje spørsmål frå VG-redaktør Gard Steiro, men han har so langt verken lukkast på e-post eller telefon.