VG-tilsette håpar Sofie-saka får ein sluttstrek i PFU onsdag: – Ikkje berre for oss, men for alle

Onsdag skal Pressens Faglege Utval vurdere Sofie si klage mot VG etter deira dekning av dansevideoen med Trond Giske på Bar Vulkan i februar. Avisa erkjenner brot på fem av sju punkt i Ver Varsam-plakaten som dei er klaga inn på.

VG er ikkje samd i at dei har utlevert upublisert materiale, men sjefredaktør i avisa, Gard Steiro, ynskjer ikkje å kommentere behandlinga i detalj før utvalet har konkludert.

– Me har ikkje meir å seie enn at me ser fram til at PFU skal behandle saka i morgon, seier han til Medier24.

Advokat representert

Sofie sin advokat, Knut-Asbjørn Solevåg, står likevel på sitt.

– Eg har ikkje noko anna meining no enn eg hadde i støtteskrivet i klaga til Sofie. Me er stadig av oppfatninga av at dei har brote dei punkta me har klaga dei inn på, seier han.

Solevåg og Sofie vil sjølv vere til stades under PFU-behandlinga onsdag.

– Me forventar ei behandling etter gjeldande reglar, og at det vert gjort på ein sakleg og ordentleg måte. Det har me den største tillit til, seier han.

– No vert me ferdig med saka

Klubbleiar Tor-Erling Thømt Ruud i VG seier til Medier24 at han skal sitje og følgje med på diskusjonane til PFU.

– Det vert interessant, seier han.

No håpar han at saka kan få ein sluttstrek.

– Me har gjort mykje internt i redaksjonen allereie, med bevisstgjering rundt kjeldebruk, opplegg, trening og kursing for å bli endå flinkare journalistar. Me har gått vidare, med ei avklaring i PFU så vert me ferdig med ska. Ikkje berre for VG sin del, men for alle andre.

– Er redaksjonen tilbake til normalen?

– Nyheitshjulet går vidare. Slik er det. No har det vore veldig mykje nyheiter på seinsommaren som har gjort at alle er i sving. Slik sett er me tilbake til normalen.

Miks av presseetiske nøtter

Trygve Aas Olsen, mediekritisk spaltist i Medier24, og fagmedarbeidar ved Institutt for Journalistikk, meiner PFU står overfor ei stor utfordring når dei skal vurdere punkt 3.6.

– Eg forstår at VG opponerer mot det punktet, fordi det ikkje er openbert. Det vil krevje mykje av PFU å behandle det, fordi det er så lite presedens i dette frå før. Her har me ein rapport, «off the record»-samtalar, og Sofie har allereie gitt materiale til TV 2. Er det då allereie publisert? Alt dette gir ein miks av presseetiske nøtter.

– Og eg er ikkje mannen til å knekke dette – iallfall ikkje dagen før PFU, legg han til.

Aas Olsen er tidlegare redaksjonssjef i Dagens Næringsliv sin Etterbørs-redaksjon, og var redaktør i fagbladet Journalisten mellom 2002 og 2007.

Unik sak

Vidare peiker han på at punkt 3.6 gjeld materiale utlevert til utanforståande, som til dømes politiet eller andre. Det står nemleg ingenting om publisering av innhald.

– Det er difor vanskeleg å vurdere, fordi dette eigentleg utanfor området, seier Aas Olsen, og legg til:

– VG har rett til å publisere materiale dei har henta inn, med mindre det er snakk om «off the record»-samtalar, som dette er. Det er utruleg vanskeleg.

Han meiner saka som skal vurderast onsdag er unik i historisk samanheng.

– Først og fremst fordi at pressekritikken fungerte. Ein skal vere glade for at TV 2, NRK, Medier24, med fleire, byrja å granske VG sin framferd her. Det gjer det òg unikt at VG sjølv legg seg paddeflate, seier Aas Olsen.