Frp-Helgheim meiner media har drive kampanje­journalistikk for å få heim IS-kvinna

Det var på Debatten torsdag at innvandringspolitisk talsmann Jon Helgheim i Framstegspartiet sa at media har drive kampanjejournalistikk for å få heim IS-kvinna og hennar born.

Burde vore meir kritisk

– Det eg kritiserer er det massive trykket som ikkje er proporsjonalt i forhold til andre saker kor menneske slit, seier Helgheim til Medier24.

– Eg har ingen problem med at media oppsøkjer enkeltsaker og legg trykk på politikarar for å hjelpa, men eg reagerer på det massive trykket frå media som reiser ned og let ei terrormistenkt sitja og uimotsagt lira utav seg at ho angrar, seier Helgheim vidare.

Han meiner mellom anna at norske medium sine reportasjar hos kvinna i al-Hol-leiren har vore ukritiske, og framstilt ho i offerrolla.

– Ein burde vore mykje meir kritisk innstilt til kva ho faktisk har gjort, seier ho.

– Du meiner media har drive kampanjejournalistikk?

– Ja, det har vore ein kampanjejournalistikk kor ein har set massivt fokus på dette for å pressa fram ei handling, seier Helgheim.

VG: – På ingen måte for ukritiske

VG er blant dei som har vore til stades i al-Hol-leiren i Syria, og har levert både reportasjar og meiningsartiklar om problematikken.

Mellom anna gjorde dei dette intervjuet med ho i juni i fjor.

– Me har på ingen måte vore for ukritiske. Me har jobba kritisk og for å få fram mest mogleg fakta i denne saka. Me har hatt eit utgangspunkt i å belysa saka breitt, med mange ulike perspektiv. Min påstand er at me har lukkast veldig godt med det, seier nyheitsredaktør Tora Bakke Håndlykken i VG til Medier24.

Ho forklarar den massive medieomtalen slik:

– Det er ein situasjon med stor offentleg interesse, med mora og to born – der det eine skal vera sjukt. Det er ein risikosituasjon for norske styresmakter, og det er ei sak med fleire dilemma og stor sprengkraft. At me skal ha ei omfattande og inngåande dekning av det er opplagt.

– Helgheim er kritisk til at de gir denne saka meir merksemd enn andre, som ikkje har ei terrormistenkt mor, som slit i utlandet. Kva tenkjer du om det?

– Denne saka har stor offentleg interesse av ei rekkje grunnar, og me går inn og dekkjer det kritisk også – både operasjonen som norske styresmakter har vore ein del av, dei ulike dilemma og kva politikarane våre meiner om den saka, seier Håndlykken.

Sa opp abonnement i protest

Torsdag kveld skreiv Sunnmørsposten at Møre og Romsdal Frp seier opp abonnementet på avisa som følgje av ein leiarartikkel der avisa skriv at «Vil Frp ut av regjering fordi Norge berger et fem år gammelt barn fra døden i Syria, så står døra åpen».

– Det er vanskeleg å forstå kven som kan ha funne på å skrive noko så sprøtt, seier leiar Frank Sve i Møre og Romsdal Frp til Medier24.

Han får støtte av Helgheim, som meiner avisa gjekk altfor langt i karakteristikkane av Frp.

– Dei forsøker å demonisera dei som har andre innfallsvinklar, seier han til Medier24.

– Sikkert ting som kan gjerast betre

Helgheim seier kritikken gjeld både riks- og regionaviser, kommentatorar og redaktørar.

– Dei legg veldig press for å få til ei handling, og kjem med eit overveldande trykk frå leiar- og kommentatorplass om at ein må handla, seier han.

Styreleiar i Norsk Redaktørforening og sjefredaktør Hanna Relling Berg i Sunnmørsposten er ikkje samd i kritikken som kjem frå Frp.

– Eit politisk parti, som sit i regjering, må tola kritikk for sine standpunkt, seier ho til Medier24.

Om dekninga av IS-kvinna har vore for einsidig, svarar ho:

– Ein må alltid sjå på dekninga med eit kritisk søkjelys, men ein treng eit betre grunnlag for å gå inn i analysen. Det er heilt sikkert ting som kan gjerast betre.