Raumnes auka digitalt i fjor – men slit med å oppretthalda abonnementssalet

Akershus-visa leverte det fjerde beste driftsresultatet siste 20-åra i fjor. – Litt meir ureint farvant i år, seier sjef Fred Gjestad til Medier24.

Publisert 11.06.2019 - 05:55

Denne artikkelen er over to år gammel.

Raumnes i Nes i Akershus betra drifta betydeleg i fjor etter at dei kutta om lag ein halv million i kostnadar, samstundes som dei auka inntektene frå digitale abonnentar.

– 2018 var eit veldig godt år, seier redaktør og dagleg leiar Fred Gjestad til Medier24.

Han held fram:

– Me har ideelle eigarar som ikkje tek utbytte. Me har 400 lokale aksjonærar, og har ein dryg halv årsomsetnad i fri eigenkapital, som gjer at me driv med veldig låge marginar.

Fryktar ny distribusjonsavtale

Avisa har fått inn fleire digitale abonnentar – og hadde ved utgangen av 2018 om lag 16 prosent digitale abonnentar, mot fem prosent i byrjinga av året.

Raumnes kjem ut tre dagar i veka, og har eit opplag på rundt 5.600.

Annonseinntektene frå Amedia-samkøyringa gjekk ned 15 prosent i 2018, medan lokalt selde annonser gjekk ned 1,7 prosent, skriv styret i rapporten.

– I 2019 er det litt meir ureint farvatn. Me er i ein sårbar bransje, og me klarar ikkje å halda oppe eit like kraftig abonnementssal som i 2018, seier Gjestad.

I mai skreiv Medier24 om at Amedia Distribusjon seier opp avtale med over 20 aviskundar, etter at Dagens Næringsliv først melde om saka. Raumnes er blant dei som vert råka.

– Den fryktar me. Det vil gå hardt utover oss, då prisen vert skrudd opp 20 prosent, seier Gjestad.

Agderposten-samarbeid

Avisa fekk i 2018 427.000 kroner i produksjonstilskot.

Raumnes er med i Agderposten Medier sitt partnerprogram, saman med Hallingdølen, Hordaland/Vaksdalsposten, Sunnhordland, Bladet Vesterålen, Vest-Telemark Blad og Setesdølen – i tillegg til konsernet sine eigne aviser, Varden, Agderposten, Grimstad Adressetidende, Lillesands Avis og Vennesla Tidende.

Samarbeidet er både med på å kutte kostnadar for avisa, samstundes som det styrkar utviklingskrafta deira, står det i rapporten.

Dagleg leiar og redaktør, Gjestad, hadde ei løn på 950.000 kroner i 2018.