Rahand fekk fast jobb i NRK som 22-åring. No blir han nyheitsanker. – Det kom gledestårer
Kurdiske Rahand Bazaz (23) har jobba som journalist i ti år – men har ingen journalistutdanning. – Erfaringa slår alt det formelle 10 av 10 gongar, seier han til Medier24.
For ti månadar sidan var ambisjonen til Rahand Bazaz å fullføre ein master i juss, og bli politiadvokat. Så kom det eit tilbod om sommarjobb i NRK Østfold.
– Men før eg i det heile teke rakk å signere papira fekk eg tilbod om fast jobb. Og sju månadar ut i reporterjobben får eg lov å gå inn og vere programleiar i Distriktsnyheitene. Det har gått frykteleg fort, og det har endra livet heilt, summerer Bazaz opp til Medier24.
Rahand Bazaz fire tips for å få fast jobb:
Søk på vikariat, sommarjobbar eller andre korte stillingar.
Ver svolten på å lære heile tida. Heile tida spør etter råd, still eit spørsmål for mykje til ein kollega om kvifor ho/han skriv ein setning på den måten.
Ikkje ver redd, stikk hovudet fram og ta initiativ når ein leiar spør om noko. Å drive god journalistikk er som toppidrett. Du må heile tida vere på jakt etter saker/idear.
Ver audmjuk. Lær av feil. Redaksjonar vil gjerne ha folk som ynskjer å lære meir og kunne ta fleire ulike oppgåver i redaksjonen.
Bazaz er kurder, og kjem opphavleg frå dei kurdiske områda i Irak.
– Gret gledestårer
For medan dei fleste andre tek den tradisjonelle journalistutdanninga for å lande draumejobben i media, studerte Bazaz rettsvitskap – ved Universitetet i SørØst-Norge – som han fullførte ein bachelor i for halvanna år sidan.
– Om ein tenkjer på alle som utdannar seg som journalist og slit med å få jobbar får ein nesten dårleg samvit, men ein må tenkje på seg sjølv, seier han.
Måndag har han første dag i opplæring, og allereie over nyttår får me sjå Bazaz leie nyheitssendingane til NRK Østfold. Kanskje før, om han får prøvd seg under opplæringa.
– Det er nokon som skal ut i permisjon, på ubestemt tid, så sjansen kom tidlegare enn venta, seier han.
– Eg gret nokre gledestårer. Ein ting er å få jobbe som journalist, men ein annan ting er å få moglegheita så fersk og urutinert. Eg byrja som frilansjournalist som 13 år gammal i Fredrikstad Fotballklubb. Då jobba eg frivillig utan å få pengar. Eg har jobba frykteleg lenge for dette, og eg har gått steg for steg. Eg har ikkje vore mett på kunnskap og læring. Det er det dei tårene betyr, seier han.
Rahand Bazaz, journalist i NRK Østfold.Privat.
– I Demokraten jobba eg med absolutt alt
I tillegg til å ha jobba for FFK sin nettportal, har 23-åringen arbeidd for Demokraten frå 2012 til 2018. Det gjer opp for manglande utdanning, ifølgje han sjølv.
– Erfaringa slår alt det formelle ti av ti gongar. Ein ting er å sitje på skulebenkjen og lære om korleis ein skal byggje opp nyheitssaker og liknande, men å faktisk gjere det er noko anna. Ein lærer på ein heilt annan måte. I Demokraten jobba eg med absolutt alt, seier han, og legg til:
– Den raske læringskurva eg hadde gjorde at eg står her med ei litt tryggare stemme i dag.
Tvert om meiner han at han kan ha ein fordel med jussutdanning.
– Eg tek med meg jussutdanninga når eg dekkjer ulike saker. Det er slett ingen ulempe i ein slik jobb, seier han.
