Filter-Klungtveit positiv til NRK sitt «fake news»-stunt: – Ein­sidig kritikk

Debatten har hagla om «fake news»-prosjektet til Folkeopplysningen på NRK kor dei har spreidd falske nyheiter kring skulevalet i Lillestrøm for å manipulera skulevalet.

Få timar etter at VG avslørte saka har både statsminister Erna Solberg, kommunal- og moderniseringsminister Monica Mæland og ei rekkje ungdomspolitikarar gått hardt ut mot stuntet, som skulle få elevar ved Lillestrøm VGS til å stemma på Senterpartiet.

– Frykteleg viktig tema

Redaktør i Filter Nyheter, Harald Klungtveit, derimot, er ikkje like skeptisk.

– Ein del av kollegaene mine er veldig einsidige i kritikken. Eg tvilar ikkje på at intensjonane er å setja søkjelyset på noko viktig. Det er eit frykteleg viktig tema. Eg har sjølv prøvd å finna utradisjonelle journalistiske metodar for å visa kor alvorleg dette fenomenet er. Det er kjempevanskeleg å skape forståing for fake news, seier han til Medier24, og legg til:

– Difor er min ryggmergsrefleks å vera positiv til dei som forsøker.

Han meiner det vert for søkt å dra inn kanalen si statlege finansiering kvar gong dei «gjer noko kontroversielt».

– Litt av formålet med statskringkastinga er å gi rom for kontroversielle dokumentarprosjekt og andre ressurskrevjande program som kanskje ikkje ville vore mogleg å gjennomføra andre stader, seier han.

– Prinsipielt problematiske sider

Han tykkjer det er ein interessant etisk diskusjon om verkemiddel.

– Eg tykkjer ikkje dette er så svart-kvitt etisk gale som enkelte skal ha det til. Det er for tidleg å skyta det ned som einsidig gale eller bruka veldig store ord om at dei undergrev demokratiet og den type merkelappar, seier Klungtveit.

– Men kva om dette potensielt kunne ha vippa inn eit ekstra mandat i kommunestyret for Senterpartiet?

– Alle forstår at dette ikkje har vippa noko som helst i kommunevalet i Lillestrøm – men det er openbert prinsipielt problematiske sider her, legg han til.

Episoden skal på lufta i november, og verken prosjektredaktør Jan Egil Ådland i NRK sin eksternredaksjon og Folkeopplysningene-programleiar Andreas Wahl tek sjølvkritikk på framgangsmåtane.

Kunne aldri skjedd i TV 2

Ei som er usamd med Klungtveit i sin optimisme er nyheitsredaktør Karianne Solbrække i TV 2. Dei er NRK sin største konkurrent på nyheits- og aktualitetsjournalistikk på tv – og avviser at dette kunne ha skjedd hos dei.

– Eg reagerer negativt på dette. Eg forstår prosjektet – men målet helgar ikkje middelet i denne situasjonen, seier ho til Medier24.

– Det er bra at NRK set søkjelyset på «fake news», fordi det er blant dei største utfordringane me har i dagens mediesamfunn. Men ein set truverdet til seg sjølv og andre mediehus i tvil. Det meiner eg er altfor risikabelt.

– Kva om programmet endar opp med å snu på det – og styrkja truverdet til redigerte, tradisjonelle, medium?

– Eg er sikker på at veldig mange vil læra ei lekse av det. Slik sett kan det ha ein positiv effekt. Eg er derimot redd for den potensielle skaden som har skjedd.

– Så om eit produksjonsselskap hadde pitcha TV 2, kva hadde responsen vore?

– Eg hadde svart nei på det. Den sjansen hadde eg ikkje teke sjølv om eg ser at målet med det er godt. Eg meiner risikoen for at «fake news» eller løgn skal setja seg er altfor stor.