Statsminister Erna Solberg (H) snakka til Facebook live etter generalprøve i Operaen før regjeringa sin festmiddag for kongeparet i høve deira sine 80-årsdagar i 2017.

Håkon Mosvold Larsen / NTB scanpix

Fersk undersøking:

Berre éin av ti stolar på politikarane sine kampanjar og løfter i sosiale medium

– Eg oppfattar oss ikkje som svulstige i sosiale medium, svarar Venstre.

Ole Alexander Saue

Publisert 27.08.2019 - 05:55

Denne artikkelen er over to år gammel.

Nyleg skreiv Medier24 at fleire stortingsparti vrakar annonsering i papiraviser og brukar dei fleste av annonsemidlane i sosiale medium som Facebook, Instagram og Snapchat.

No visar ei fersk InFact-undersøking for Medier24 at berre 9,4 prosent stolar på politikarane sine kampanjar og valløfte i sosiale medium.

– Det er ikkje slik at du gjer eit godt val berre fordi du brukar sosiale medium. Høgre kjem til å ha den mest avanserte Some-avdelinga, men dei kjem ikkje til å gjere eit godt val.

Forhandling

Det seier Ketil Raknes, høgskulelektor i kommunikasjon på Høyskolen Kristiania. Han har vore politisk rådgjevar i Kunnskapsdepartementet og statssekretær i Miljøverndepartementet for Sosialistisk Venstreparti. Raknes har i tillegg vore seniorrådgjevar i Burson-Marsteller.

Han er ikkje overraska over funna i undersøkinga.

– I eit fleirpartisystem er kampanjeløfte ein rørleg storleik. I 90 prosent av høva vil parti love noko, og få litt av det etter at dei har forhandla med andre parti, seier han.

Saka held fram under grafen.

InFact spurde 1.009 personar i Norge over 18 år 5. august. Feilmargin maks tre prosentpoeng.

– Som regel bra og balansert

Høgre er blant partia som nyttar mest ressursar på annonsering og kampanje i sosiale medium som Facebook og Snapchat. Kampanjesjef Thoralf Granerød i Høgre tykkjer det er ei vanskeleg spørsmål å svare på.

– Utfordringa vår er at sosiale medium er så mangfaldig, og då er det vanskeleg for brukarane å vite kva som er seriøse ting frå partiet, og kva som er fake news og andre forstyrrande element, seier han.

Han tykkjer norske politiske parti stort sett opptrer ærleg i sosiale medium.

– Det dei går ut med er som regel bra og balansert.

Han legg til:

– Ein skal hugse på éin ting, og det er at ein i valkampsamanheng ofte ynskjer å mobilisere sine eigne veljarar.

Steinar Haugsvær, kommunikasjonssjef i Venstre.

– Partia når nok ut til sine basisveljarar i sosiale medium. Elles er inntrykket at folk flest ser veldig mykje der ute som dei ikkje orkar å ta omsyn til.

– Ikkje for svulstige

Steinar Haugsvær, kommunikasjonssjef i Venstre, fortel at partiet satsar tungt i sosiale medium – på same nivå som under stortingsvalet i 2017.

– Eg trur alle politikarar, frå alle parti, forsøker å halda valløfta sine, seier han.

– Sjølv merkar eg, som samarbeider med mange kommunar i Norge, at valløfte er ting politikarar verkeleg ynskjer å gjennomføre.

Han tykkjer sjølv dei ikkje tek for hardt i i sosiale medium.

– Eg oppfattar ikkje at me, i dei kampanjane me har laga, har vore for svulstige og kome med umoglege løfter.

– Obama trefte ekstremt bra

Raknes, ved Høgskulen i Kristiania seier – som Medier24 rapporterte måndag – at det er ein tydeleg tendens at annonsane vert flytta over frå tradisjonelle- til sosiale medium.

– I land som Norge er det endå mindre overraskande. I Norge har me ikkje hatt tv-reklame, og partia har hatt veldig små budsjett for annonsering generelt, seier han.

Raknes peiker spesielt på tidlegare USA-president Barack Obama sine valkampkampanjar i 2008 og 2012.

– Obama vart genierklært fordi han brukte sosiale medium – men han hadde ein bodskap som trefte ekstremt bra.