Filter Media har nesten dobla inntektene, men taper stadig pengar: – 2019 har vore grufullt

Ferske rekneskapstal viser at Filter Media, driftsselskapet til Filter Nyheter, Filter Film og TV og «content marketing»-sida Filter Partner, i 2018 fekk eit underskot på 2,6 millionar kroner, ned frå -2,3 millionar kroner i 2017.

Trass i nesten dobla omsetnad, frå 5,2 millionar kroner til 9,3 millionar kroner, går altså Filter Media nok ein gang i minus. Inntektshoppet vart slukt av ei nær dobling i løns- og driftskostnadar, og i tillegg auka dei bemanninga frå sju til ti personar i 2018.

Tidlegare Dagbladet-journalist Harald Klungtveit er redaktør i nettavisa.

– Klarte ikkje det me håpa på

– Me er veldig godt nøgd med 2018 for Filter Media. Årsaka til det er den enorme veksten på inntektssida. Det er aldri gøy å tape pengar, men me investerer i medieverksemda. Tapet plagar oss ikkje, men me skulle gjerne vore i pluss, seier mediegründer Even Aas Eng til Medier24.

Han er dagleg leiar i investeringsselskapet Venture Factory, som eig 76,5 prosent av Filter Media. Resten er eigd av Preben Carlsen via Carlsens Konsepter (8,1 prosent) og ei lang rekkje mindre aksjonærar.

Filter Media, kor Filter Nyheter er den store redaksjonelle satsinga, vert finansiert av innhaldsmarknadsføring som vert publisert på Filter Partner. Her tilbyr dei native-artiklar med ein garanti på kor mange gongar artiklane vert lese.

– Vår forretningsmodell er førebels berre basert på innhaldsmarknadsføring og native-annonsar. Me er opptekne av at journalistikken me produserer skal vere gratis og tilgjengeleg for alle. Det er der dei førebelse inntektene er, seier Aas-Eng.

– De håpte å gå i null i 2018. Når det ikkje skjer, kva er årsaka?

– Eigentleg ikkje noko uføresett, bortsett frå at me ikkje klarte det me håpa på.

– Mykje sjukdom

Filter Media har fire journalistar, medan dei kommersielle jobbar på tvers over resten av mediedivisjonen – Talent Media, CamillaPihl.no og Motor.no som dei har kommersielle samarbeid med.

– Så lenge omsetnaden aukar i den grad me ynskjer, så kjem me til å halda fram å investere pengar. Me meiner me har knekt koden ved å ha ein forretningsmodell som gjer journalistikken gratis og tilgjengeleg, samstundes som den gir ein farbar økonomi, seier Aas-Eng, og legg til:

– Kor mange nettmedium har gått frå null til ti millionar kroner i annonseomsetnad på så få år?

– Korleis ser 2019 ut?

– 2019 ser grufullt ut. Me har hatt mykje sjukdom, så me har kjempa ein kamp i medieverksemda for å halda hovudet over vatn – i det som skulle vere året der me løfta oss. Me har ikkje teke eit steg tilbake, eg trur me klarar oss betre enn fjoråret uansett, men det har vore veldig tøft. Det er heldigvis på betringas veg, og me gler oss til ekstra spanande haust.

Venture Factory gjekk ut av 2018, og inn i 2019, med ein betydeleg større portefølje av publikasjonar, då dei fekk inn Pihl i november, og inngjekk samarbeidet med Motor.no i januar.

– Og så plutseleg var me langt færre folk på kommersiell side, seier Aas-Eng.

– Kosta nokre timar nattesøvn

Gründeren er ærleg om at det har vore eit tøft halvår.

– Eg må innrømme at denne vinteren er noko av det tøffaste eg har vore gjennom som gründer. Selskapa er framleis små, så ein vert veldig sårbare for sjukdom. Den situasjonen har kosta nokre timar nattesøvn i første halvår, seier han.

– Er det ikkje fare for at ein veks for fort i den fasen de er i no?

– Spørsmålet ein må stille seg som gründer er om ein har riktig tempo i det ein held på med. Eg føler me har det no. Me har fått ein del erfaring i dei tre åra me har halde på med Filter. Det er ikkje vekst på kostnad av alt. Det meiner eg tala reflekterer. Når me omset for 10 millionar og tapar 2 millionar, så er ikkje det å veksa hals over hovud, seier Aas-Eng.

Han ville tvert om ha investert meir om dei hadde hatt sjanse.

– Eg skulle gjerne hatt meir kapital så me kunne ha vekst endå meir, og brukt meir midlar på veksten, seier han.

– Me har seld mykje mindre enn det me burde og kunne ha gjort, held Aas-Eng fram om marerittstarten på 2019.