TV 2 avslutta lite lukrativ satsing på e-sport. Likevel vil VG gi gamerane ein sjanse

Både VG og samarbeidspartnar Good Game er er førebudd på utfordringar.

Publisert 21.11.2018 - 13:52

Denne artikkelen er over to år gammel.

Førre veke annonserte VG at dei skal sende sluttspelet finalerundane av League of Legends, Rocket League og Counter-Strike: Global Offensive i Telenorligaen.

– Avtalen er å sende dette sluttspelet, med ein intensjon om eit meir langsiktig samarbeid, seier fersk administrerande direktør i VGTV, Thomas Manus Hønningstad, til Medier24.

Han er tydeleg på det står att ein stor jobb for å etablere ein stabil sjåarmasse for e-sport-sendingane.

– Marknaden tek av

– Dette er framleis relativt smalt, men VG kan vere med og nå breiare ut til folk, seier han vidare.

– På sikt er ambisjonen å tene pengar på det, ja. E-sport-marknaden tek av, dette er ein nasjonal liga og ein interessant sport, seier han.

Men det vert ikkje nødvendigvis enkelt.

TV 2s Håvard Fantoft Grutle, som arbeidde tett på deira e-sport-satsing, fortel til Medier24 at det er tøft å satse på e-sport i Norge.

– Nordmenn ser gjerne dei store internasjonale turneringane, men ikkje dei norske, seier Fantoft Grutle.

Nøydd til å leggje mykje krefter i det

I konkurranse med etablerte og gratis streaming-sider som Twitch og YouTube, er det ikkje enkelt å nå ut, meiner han.

– Det tek tid og pengar å byggje. Det er utfordrande, seier han.

Han er klår på at ein er nøydd til å tenkje nytt for å nå e-sport-publikumet.

– Du er nøydd til å bruke ressursar, og ofte må du sjå utanfor eigne rekkjer for å finne svar, seier han.

– TV 2 tente ikkje pengar på det, men me tapte heller ikkje mykje på det. Utan å gå i detalj, så er ein nøydd til å leggje mykje krefter i det for å tene pengar på det. Det gjorde ikkje me i tilstrekkeleg grad, men me tapte heller ikkje store summar, seier Fantoft Grutle vidare.

Byggjast over tid

Dagleg leiar i Good Game, Harald Strømme, er innforstått med at ein ikkje kan vente umiddelbar braksuksess med Telenorligaen på VGTV.

– Det er eit produkt som må byggjast over tid. Det innser VG òg. Det er ikkje slik at ein knipsar med fingrane så kjem dei laupande. Det må byggjast, seier han til Medier24.

Verken Manus Hønnigstad eller Strømme ynskjer å seie noko om kor mykje VGTV måtte betale for rettane.