Teigen på SKUP: – Journalistikk er vanskelegare enn å vere spinndoktor

Det skapte sjokkbølgjer i bransjen då det i slutten av november vart kjent at Espen Teigen skulle bli journalist i Nettavisen frå 1. januar.

Knapt tre månadar inn i jobben er han sendt til Tønsberg for å oververa sin første SKUP-konferanse – saman med journalist- og redaktøreliten, som han tidlegare har blitt intervjua av.

– Det er hyggjeleg på SKUP. Eg gler meg til festen. Det er litt som å vere på landsmøte, men med litt meir innhald. Det er utruleg kult å vere her, fordi det er så mange flinke folk her. Eg har blitt teken godt imot. Nokon har spørt meg om eg held føredrag, fordi dei ikkje har fått med seg at eg har skifta jobb.

– Kva skil folk frå Skup og Frp-landsmøta?

– Det er langt fleire røykjarar og menn der. Alkoholforbruket er kanskje likt. Bortsett frå i Aftenposten, då.

– Kven heng du med her?

– Eg heng med mange ulike – mellom anna folk kjenner frå politikken.

Laurdag føremiddag har han fått med seg eit kurs om KOSTRA-tala til SSB. Den ferske journalisten har som hovudoppgåve å dekkje økonomi og offentleg pengebruk i Nettavisen, og ser vidare fram til fleire kurs og føredrag om innsyn og graving i offentlege midlar.

– Har mange idear

Etter ei årrekkje i politikken er Teigen vant til interne maktkampar og politisk spel, og er difor nøgd i å endeleg bli ein del av eit fellesskap som dreg i same retning.

– I journalistikken er det meir samhald enn det er i politikken. Her jobbar me saman for å få ting til, medan det i partipolitikken er meir interne dragkampar.

– Det er ikkje byline-kamp i Nettavisen, altså?

– Det er kamp om å kome på og å levere dei beste sakene. Men alle bidreg til kvarandre.

– Eg har mange idear, men så har eg òg gode kollegaer som kjem med tips. Det er litt «sink and swim»-tankegang.

Det er eit drygt år sidan Sylvi Listhaug trakk seg som justisminister etter at kritikken hagla som følgje av den mykje omtalte Facebook-posten med teksten «Ap mener terroristenes rettigheter er viktigere enn nasjonens sikkerhet».

Teigen har sidan fortald at det var han som sto for posta som gjorde at statsråden trakk seg.

– Kva er enklast av å spinne for Sylvi Listhaug og å drive journalistikk for Nettavisen?

– Hahaha. Enklast? Begge er utfordrande. Skal ein drive skikkeleg og ordentleg journalistikk, så er det vanskelegast, fordi det krev meir jobb.

Utelukkar ikkje retur til politikken

Den tidlegare Frp-politikaren vedgår òg at det er klare likskapstrekk mellom populisme og tabloidjournalistikk.

– Utan forkleinelse er det nok ein del samanliknbare trekk i korleis ein tenkjer og skal nå ut til lesarane. Men det er noko heilt anna.

– Korleis veit me at du ikkje er i Nettavisen for å lære deg nye kommunikasjonstips?

– Eg trur det er ganske tydeleg at eg er interessert i å vere journalist. Det sa eg i eit intervju med lokalavisa for lenge sidan.

Han tør likevel ikkje utelukke ein retur til politikken riktig endå.

– Eg tør aldri å utelukke noko. Hadde du stilt meg spørsmålet om eg ville bli Nettavisen-journalist for eit år sidan, hadde eg aldri trudd det.

Internt i Nettavisen var det knyt sterk bekymring til om Teigen kunne drive objektiv journalistikk så kort tid etter at han sat i regjeringsapparatet. Sjefredaktør Gunnar Stavrum i Nettavisen var tydeleg på at han ikkje skulle skrive om partipolitikk.

– Kva med dei som meiner du pusher Frp-politikk på lesarane? 

– Då trur eg dei må koma med dømer. Min jobb er å skrive om offentleg forbruk. Eg ser ikkje at det har samanheng. Eg skriv om alt frå svenskehandel til oljebransjen og reiserekningar.

– Les ikkje Resett

For halvanna år sidan sa Teigien i eit intervju med Medier24 at han ynskja seg eit norsk Breitbart, og at objektive journalistar er ei myte.

På spørsmål om kva aviser han les i dag, svarar han:

– Eg les nesten alt. Aftenposten sidan eg var bitte liten, Dagens Næringsliv, Finansavisen, VG, sjølvsagt Medier24 – i den grad det kan kallast avis.

– Les du Resett?

– Nei, eg les ikkje Resett. Eg har aldri lese mykje alternative medier.

– Ja/nei-spørsmål: Er du ein del av «mainstream media» no?

– Eg trur alltid eg vil føle meg som ein outsider. Likevel er eg er ein del av ei avis i Akersgata, så nokon vil sikkert sjå på meg som det. Heile «MSM»-definisjonen er basert på at dei store mediene går etter det same. Slik har eg aldri oppfatta det, så eg aksepterer ikkje premissen for den greia der.

Ikkje NJ-medlem

På spørsmål om kva han ser mest fram til på årets SKUP, kjem svaret kontakt:

– Festen, sjølvsagt.

– Men fagleg …?

– Å følgje statens pengar ser eg fram til. Det er eit par bra sesjonar om innsyn, graving og visuell historieforteljing.

Og sjølv om Teigen velvillig poserer i fluktstolen til Norsk Journalistlag, er han ikkje innmeld. Og det skjer heller ikkje med det første.

– Eg føler ikke behov for at nokon andre skal representere meg, enn meg sjølv.