Espen Teigen har meldt seg ut av FrP – starter snart i Nettavisen. Internt i avisa er det uro

Nyheita om at Frp-politikar og tidlegare rådgjevar for Sylvi Listhaug, Espen Teigen, vert Nettavisen-journalist kom som ei bombe for ein månad sidan.

Spesielt i Nettavisen-redaksjonen skapte det uro. Det kom først fram i ein reportasje Dagsavisen hadde 1. desember, kor klubbleiar Kjetil Bortelid Mæland sa at journalistar hadde vurdert å seie opp jobben som følgje av tilsetjinga. 

– Mange reagerte sterkt då det vart kjent at Espen Teigen blir ny journalist i Nettavisen, seier Mæland til Medier24.

Fryktar integriteten

Trønderen står bak fleire kontroversar, og var den mest sentrale personen bak Listhaug sin kommunikasjonsstrategi. Éin av dei mange omstridde Facebook-postane frå Listhaug førte i vår til at ho måtte gå av som justisminister.

– Me frykta for Nettavisen sin integritet og om han ikkje vert oppfatta som ein objektiv journalist. Det har ingenting med Teigen som person å gjera, men det faktum at han kjem frå jobben som politisk rådgjevar for politikaren i Norge som har stått for den hardaste politiske retorikken.

Mæland stadfestar overfor Medier24 at klubben har hatt mange rundar med leiinga om tilsetjinga av Espen Teigen.

Han seier vidare at stormen har lagt seg, og at dei no ser framover. Teigen byrjar i jobben 1. januar.

– Det har vore høg temperatur. Det kan me trygt seia, seier Mæland vidare til Medier24.

Teigen: – Dei steller seg berre til det overflatiske

Sjølv svarar Teigen slik på reaksjonane overfor Medier24:

– Eg forstår at det er eit uortodokst grep av Nettavisen, men reaksjonane er litt i overkant.

Han legg til:

– Det er ikkje første gang ein person går frå politikk til media, som til dømes Jens Kihl. Han gjekk frå SV til Klassekampen, og er no i Bergens Tidende. Han er ein veldig god journalist, så eg tykkjer det er litt synd at ein berre steller seg til det overflatiske. Eg er ein person som er ute etter å heile tida gjere ein best mogleg jobb i den jobben eg er i.

Teigen har no meld seg ut av Framstegspartiet.

Sjefredaktør og administrerande direktør i Nettavisen, Gunnar Stavrum, ynskjer ikkje å kommentere enkeltpersonar i personalsaker, men seier følgjande til Medier24:

– Det har skjedd mange overgangar frå politiske apparat til pressa – og motsett – og det er nokså normalt at ein klarar å handtere det utan å bryte etiske reglar.

– Norske medier har Vær varsom-plakaten som eit etisk regelverk som seier korleis ein skal ta vare på integritet og kva dobbeltroller ein skal unngå. Det skal me sjølvsagt følgje. Ulike formar for bindingar i samband med tidlegare arbeidsgjevar er ikkje noko nytt, legg han til.

– Offentleg sløsing er politikk

Klubbleiar Mæland, som har vore i Nettavisen sidan 2000, er kritisk til at Teigen blir sett til å dekkje «offentleg pengebruk» – berre månadar etter at han var ein del av regjeringsapparatet.

– Er ikkje det politikk, då? Det vert iallfall veldig vanskelege skiljelinjer. Offentleg sløsing – kva politikarar brukar pengar på – er i høgaste grad politikk. Det aller meste me skriv om, hamnar til slutt hos politikarane, uansett. Klarar ein då å vere objektiv, og føre fram meiningane til begge sidene på ein god måte?

Stavrum seier at Teigen skal dekkje «offentleg pengebruk», men at han ikkje skulle dekkje partipolitikk. Det meiner Teigen altså at han skal få til.

– Vert det vanskeleg å drive objektiv journalistikk med så sterke politiske synspunkt, Teigen?

– Det vert ei omstilling, men med ein gang eg byrjar trur eg det vil gå opp for veldig mange at eg først og fremst er journalist, og ikkje meir enn det, svarar Teigen.

Stavrum: – Trygg på at tilsetjinga er god

Klubbleiaren er tydeleg på at det ikkje er Teigen som person, eller politikken han har representert, som vert utfordrande. Han peiker på retorikken og kommunikasjonsstrategien som problematisk.

– Ein ting er kva Listhaug meiner, men det er måten ho har kommunisert på som har vore veldig hard. Teigen har vore ein sentral aktør i å forme ut den strategien, seier Mæland.

Stavrum er komfortabel med at han har gjort ei god tilsetjing, og ynskjer ikkje å kommentere interne diskusjonar eksternt.

– Journalistar i Nettavisen har vurdert å seie opp jobben som følgje av tilsetjinga. Kva tenkjer du om det?

– Eg kan ikkje kommentere det. Eg er trygg på at tilsetjinga er god, og eg trur den vil føre til godt og interessant stoff i Nettavisen, utan at me kjem på kant med det etiske regelverket. Me skal vere oppmerksomme på saker kor me må vere ekstra aktsam, seier Stavrum.

– Sjølvsagt er det redaktøren i eit medium som står ansvarleg for mediet si profil på utsida, og tilsetjingar. Internt i Nettavisen. I alle saker har me diskusjonar kor me kan vere ueinige. Når avgjerda er fatta, så vert det gjennomført, seier Stavrum.

– Offentleg pengebruk er vel politikk?

– Han skal ikkje dekkje saker han sjølv har arbeidd med. Men alt i samfunnet kan definerast som politikk, så om han skal skrive om offentleg ressursbruk, kan ein seie at det òg er politikk, men altså ikkje om enkeltsaker han sjølv har bindingar til.

Stavrum føyer til:

– Det som ikkje gjer ein inhabil er at ein har oppfatningar i livet. Alle journalistar har meiningar og synspunkt om ting. Det gjer ein ikkje inhabil. Eg er meir redd for skjulte bindingar, der ein ikkje er opne om det. I denne konkrete saka er det velkjent, seier han.