Stavrum: – Norske medier bruker mykje pengar på å rydde opp for Facebook

– Sviktar mediene sitt samfunnsansvar? spurde debattleiar Ellen Wesche Guttormsen frå NRK då Oslo Journalistklubb og Oslo Redaktørforening arrangerte open debatt om kommentarfelt i nettavisene med tittelen «Har mediene gitt opp nettdebatten?».

Debatten kjem i kjølvatnet av at Nettavisen like over nyttår bestemte å stenge sitt kommentarfelt. Òg Vårt Land stengde kommentarfeltet på debattinnlegg for nokre veker sidan.

For nøyaktig tre år sidan var det Dagbladet som stengde sitt kommentarfelt.

– Verdien av vårt kommentarfelt var svært lite, nesten uansett korleis me målte det, sa sjefredaktør i Nettavisen, Gunnar Stavrum på debatten tysdag.

– Det har skjedd ein del med ytringsklimaet i Norge. Det eg har vore mest oppteken av er at Nettavisen skal vere ein liberal stad der ein kan meine ting som er på tvers av det andre meiner, la han til.

Debatten har flytta seg

Medan Nettavisen stengde kommentarfeltet på sine nettsider, går debatten stadig på deira Facebook-sider. Han ser ein tendens til at norske medier vel å ikkje publisere saker på det sosiale mediumet for å unngå å bruke mykje tid på å moderere kommentarfeltet.

– No har debatten flytta seg til stader utan moderering i det heile teke, som til dømes på Facebook. Norske medier bruker mykje pengar for å rydde opp for Facebook.

– Eg trur fleire medier har opplevd litt sjølvsensur i kva me deler på Facebook, la han til.

Saka held fram under biletet.

Document.no-redaktør, Hans Rustad, meiner det er påfallande at Facebook ikkje modererer kommentarfeltet sitt godt nok.

– Det er eit paradoks at politisk korrekte Mark Zuckerberg ikkje førehandsmodererer Facebook-kommentarane. Der er det ein skitstorm, sa han. 

Debattdeltakar Shazia Majid, som er journalist i VG, fortalde om sine opplevingar med kommentarfeltet i VG – som har brukt mykje ressursar på å moderere sitt kommentarfelt.

– Som kvinne, muslim, og mørkhuda er du gjenstand for kritikk frå alle leirar. Uansett kva du meiner, sa Majid.

– Å engasjere seg i kommentarfelt og følgje med alle kommentarar i sosiale medier slutta eg med fordi det vart for tungt, slitsamt og massivt, la ho til.

– Ikkje bra nok representasjon

Aftenposten-journalist og samfunnsdebattant Ingeborg Senneset meiner aviser bør ta representasjon på alvor og at norske medier ikkje har vore gode nok på å spegle fløyene.

– Det går på kjeldearbeidet og representasjon hos avisene. Det er ikkje bra nok representert verken på høgresida eller blant minoritetar. Slikt må me sjå på.

Ho meiner at kommentarfeltet kan ha stor verdi.

– Når ein svarer kommentarar er det mange som innser at det faktisk er nokon på motsett side, og då kan det ver dei endrar seg. Om ein ber folk om dei kan seie ting på ein litt annan måte kan det hende det fungerer. Andre gongar ikkje.

Rustad var blant dei som meinte ein går i feil retning ved å stenge kommentarfelt. Han seier i tillegg at dei merka auka aktivitet etter at Nettavisen stengde sitt kommentarfelt.

– Det er rimeleg å tru at me har arva nokre av debattantane til Nettavisen. Eg forstår ikkje grunngjevinga til Stavrum. Han juksar litt. Han seier folk skitnar til – og det gjer dei ikkje. Ein må skilje mellom meiningar og utskjelling. Du må heve kvaliteten, fordi utskjelling har ingen verdi, sa Rustad.

Arva Nettavisen-debattantar

Vidare seier han seg nøgd med eige kommentarfelt på Document.no, kor fleire har meld seg for å bidra til å moderere det.

– Dei som ikkje kan ta av seg på beina før dei går inn, må finne seg i å stå utanfor. Eg er skeptisk til at media har byrja å dra fram dei verste kommentarane for å forsvare stenginga. Det er forsøplande, sa han.

– Det er høg kvalitet på dei fleste innlegg, men dei må ha noko å tilføye. Dei som dreg inn det same heile tida – uansett tema – er lov, men det forsøplar debatten. Du må foredle debatten, sa han, og la til:

– At Resett kom inn fekk oss til å innsjå verdien av å foredle debatten. Det brukar me mykje tid på.

Redaktør for lesarutvikling i Dagens Næringsliv, Ingeborg Volan, var blant dei i publikum som tok seg tid til å stille spørsmål frå salen.

– Det er mykje positivt som kjem ut frå den gode delen av kommentarfelta. Er me i ferd med å kaste det under båten? Fleire kjem med rettingar på oss når me til dømes har rekne- eller skrivefeil. Førre veke fekk me ein kjempegod kommentar på Facebook som vart eit debattinnlegg hos Dagens Næringsliv, sa ho.