Stram økonomi for Presse­forbundet: No kan det bli dyrare for medlemskap

I 2018 som året før drog Norsk Presseforbund inn åtte millionar kroner i kontingent frå medlemsbedrifter.

Utan betydeleg kontingentsauke, men høgare kostnadar, betyr det svekkja årsresultat for Presseforbundet i fjor, som oppnådde eit driftsresultat på 555.000 kroner, ned frå 882.000 kroner i 2017.

Saka held fram  under tabellen.

– Det ligg på nivået som tidlegare. Me har ikkje eit krav på å levere driftsmarginar, så eg vil seie me har ein veldig stram økonomi, men det er ingen faresignal her, seier generalsekretær Elin Floberghagen i Norsk Presseforbund til Medier24.

No skal forbundet sjå på kontingentsfordelinga blant medlemmane.

– Er dette rimeleg?

Presseforbundet vert i dag finansiert av medier, redaktørar, og journalistar – representert ved presseorganisasjonane dei er medlem i. I tillegg betalar kringkastarar som til dømes TV 2, NRK, NENT og Discovery direkte til Presseforbundet, då ikkje alle er medlem av andre presseorganisasjonar.

Dermed er kringkastarane direkte medlemmer, medan MBL-medlemmane er indirekte medlemmer, og representert ved MBL – som i fjor betalte 2,4 millionar kroner i årleg kontingent til forbundet.

– Er det ei rimeleg fordeling mellom utgjevarane i dag, spør Floberghagen.

No skal nemleg eit utval sjå på alternative måtar å innkassere medlemsavgiftene på.

– Allereie i september skal det leggjast fram forslag til ny finansieringsmodell og kontingentsfordeling. Ein har gjort små justeringar opp gjennom, som no ser litt pussig ut – og som me bør sjå på på nytt, seier ho vidare.

– Har de ikkje hengt med i timen?

– Kontingentfordelinga meiner eg ikkje er ein gjennomtenkt idé for mediebransjen, seier ho.

– Ting har endra seg

Aviser som ikkje er direkte medlem betalar dermed potensielt mindre enn til dømes Discovery, som er direkte medlem – trass i at avisene oftast er oppe i PFU. Den einaste praktiske skilnaden er at avisene er representert i NP sitt styre og leiing ved MBL.

– Ser me på PFU-klagestatistikken, er det ikkje Discovery og NENT som ligg på toppen. Dei driv meir med underhaldning enn nyheitsjournalistikk. Avisene er til dei grader med i PFU-systemet, seier Floberghagen.

Tidlegare var det MBL, NJ og NR som finansierte presseforbundet, medan NRK hadde si eiga sjølvdømmeordning. Då TV 2 og NRK etter kvart vart ein del av forbundet, bygde dei eigne system og avtalar for dei. Sidan har både NENT og Discovery blitt ein del av Presseforbundet.

– Det er litt pussig sett saman. Konstruksjonen er blitt til fordi ting har endra seg. No er tida inne for å sjå på heile systemet, seier ho.

Floberghagen er førebels usikker på kva ei endring i kontingentsfordelinga kan føre til.

– Eg veit ikkje enno. Me skal leggje fram nokre forslag om alternative veger å gå for finansieringsutvalet, seier ho på spørsmål om det på sikt kan sikre høgare, og meir stabile, inntekter for Presseforbundet.

– Ikkje høge lønnskostnader

I notane for rekneskapen 2018 kjem det fram at generalsekretæren i 2018 hadde ei lønn på 1,3 millionar kroner, medan det vart utbetalt 4,7 millionar kroner i lønn til dei andre fire tilsette, i tillegg til frilansarar.

– De har høge lønnskostnadar?

– Nei, ikkje samanlikna med dei andre presseorganisasjonane, seier Floberghagen.

Ho peiker i tillegg på auka lønnsutgifter til frilansarar som følgje av både fleire og meir profesjonelle klager.

– Me har brukt ein god del på ekstrahjelp. Det er mykje jobb om dagen, seier ho.

– Ville det ikkje vore rimelegare å tilsetje nokon fast?

– Det skal me diskutere no, seier Floberghagen.