Generalsekretær Elin Floberghagen i Norsk Presseforbundet, Josimar-redaktør Håvard Melnæs og generalsekretær Pål Bjerketvedt i Norges Fotballforbund.

Elin Floberghagen klagar Josimar inn til PFU for brot på kjeldevernet

Generalsekretær Elin Floberghagen i Norsk Presseforbund brukar initiativretten. – Eg trur me har gode moglegheiter for å ikkje bli felt, seier Josimar-redaktør Håvard Melnæs.

Ole Alexander Saue
Publisert

Denne artikkelen er over to år gammel.

Elin Floberghagen i Norsk Presseforbund klagar Josimar inn til Pressens Faglige Utvalg ved bruk av initiativretten, stadfestar ho overfor Medier24 torsdag ettermiddag.

To punkt

Josimar har vore i hardt vêr dei siste vekene etter at dei blåste generalsekretær Pål Bjerketvedt i Norges Fotballforbund som kjelde etter at han klaga dei inn til PFU for å ha publisert informasjon han sjølv var anonym kjelde til.

– Eg gjer dette fordi eg meiner det er eit grunnleggjande prinsipielt spørsmål, som det har vore debatt rundt. Eg meiner PFU må avklara og behandla dette, seier Floberghagen til Medier24.

Ver Varsam-plakaten:

3.4  Vern om kjeldene til pressa. Kjeldevernet er eit grunnleggjande prinsipp i eit fritt samfunn og ein føresetnad for at pressa skal kunne fylle samfunnsoppgåva si og sikre tilgangen på vesentleg informasjon.

3.5  Gi ikkje opp namnet på kjelda til opplysningar som er gitt fortruleg, dersom dette ikkje er uttrykkjeleg avtalt med vedkomande.

Dette er første gang Floberghagen brukar initiativretten sidan ho byrja i jobben for dryge tre år sidan.

Generalsekretæren meiner Josimar har brote både punkt 3.4 og 3.5 i VVP.

– Initiativretten skal brukast med varsemd, og berre på store prinsipielle spørsmål eller for folk som ikkje er i stand til å klaga sjølv. Generelt er eg tilbakehalden, legg ho til.

– Viktig debatt

Ho sa til Medier24 for knappe to veker sidan at saka skal opp på styremøtet til Presseforbundet 19. juni, og at ho ville bestemma seg før det.

Pål Bjerketvedt, generalsekretær i Norges Fotballforbund (NFF), på Ullevaal Stadion.

 – Kva tykkjer du om debatten kring saka i mellomtida?

– Eg tykkjer debatten er viktig, men eg tykkjer også det er veldig viktig at det er utvalet som vurderer presseetikken og behandlar denne klaga.

Klaga er enno ikkje ferdig skriven, og det er for tidleg å seia når klaga skal behandlast.

Optimistisk

Josimar-redaktør Håvard Melnæs er glad for at Floberghagen tek dei til PFU på nytt.

– Eg trur me har gode moglegheiter for å ikkje bli felt. Om me ser argumenta til Gunnar Bodahl-Johansen, Gøran Skaalmo og Steingrim Wolland, så klarar dei å diskutera og reflektera rundt kjeldevernet. Elin Floberghagen og Bernt Olufsen og co. klarar berre å seia at kjeldevernet er heilagt og at det står til Dovre fell, seier han til Medier24.

Redaktør i Josimar, Håvard Melnæs.

Melnæs legg til:

– Eg tenkjer det er ein del spørsmål me treng svar på. Skal ein kunne bruka pressa sine eigne instrument for å sverta eit medium med falske skuldingar? Skal ein kunne gøyma seg bak kjeldevern når ein maktperson opptrer på denne måten? Skal PFU tillata slik maktmisbruk? Floberghagen og PFU har aktivt forsøkt å dekkja over misbruk av kjeldevernet.

Bjerketvedt i NFF ynskjer ikkje å kommentera saka, skriv han i ein sms til Medier24.

– Har fått mykje merksemd

Styreleiar Eirik Hoff Lysholm i Norsk Presseforbund seier til Medier24 det er naturleg å diskutera saka på styremøtet fredag.

– Det er fordi saka har fått mykje merksemd og for å høyra styret sine synspunkt på saka, seier Hoff Lysholm.

Generalsekretær Elin Floberghagen i Norsk Presseforbund (NP). Her i samtale med styreleiar i NP og Dagsavisen-redaktør Eirik Hoff Lysholm.

– Er det aktuelt å sanksjonera Josimar som med overlegg har avslørt ei anonym kjelde?

– Brot på kjeldevern, og innhaldet i saka, må diskuterast i PFU. Det er ikkje ei styresak, seier han.
norges fotballforbund josimar håvard melnæs elin floberghagen breaking news pål bjerketvedt josimar-saken

Ledige stillinger:

Se alle ledige stillinger her

Powered by Labrador CMS