Nettavisen nektar for at Teigen var inhabil då han intervjua Tonning Riise: – Ikkje ein gong ein spiker å koke suppe på

Den siste tida har Nettavisen i utstrakt grad sett søkelyset på potensielt problematisk samrøre mellom politikarar og journalistar.

Etter at ei rekkje Oslo-baserte journalistar og kommentatorar deltok på Hadia Tajik (Ap) og Kristian Skard sin bursdagsfest i slutten av februar, har Nettavisen skrive ei rekkje kritiske artiklar om temaet.

Torsdag førre veke skreiv Nettavisen-journalist og tidlegare rådgjevar for Sylvi Listhaug (Frp), Espen Teigen, sak om at Høgre-politikar Kristian Tonning Riise gir seg i politikken.

Det skjer to månadar etter at Teigen byrja i jobben som journalist i Nettavisen. Tilsetjinga skapte stor intern uro, og klubbleiar Kjetil Bortelid Mæland uttrykte skepsis overfor Medier24. Både Teigen og sjefredaktør Gunnar Stavrum avviste at Teigen skulle dekkje partipolitikk.

No har han intervjua Tonning Riise, om lag eit halvt år etter at Teigen var i Høgre-politikaren si private bursdagsfeiring. Nedst i Nettavisen-saka står det presisert at Teigen er tidlegare Frp-politikar.

– Dette var ei heilt streit nyheitssak, som Kristian tok kontakt med meg om, seier Teigen til Medier24.

«Verdens beste venner og familie»

Den 4. september la Tonning Riise ut eit Facebook-innlegg med 16 bilete, fleire med Teigen til stades på, og medfølgjande tekst kor han mellom anna skriv:

«Jeg har verdens beste venner og familie! Takk til alle som var med og sørget for en skikkelig knall bygdefest på lørdag, i anledning min (kommende) overgang fra de unge 20-årene til de 30.»

Generalsekretær i Norsk Presseforbund, Elin Floberghagen, tykkjer det er bra at Nettavisen er opne på Teigens tidlegare arbeidsforhold, men at ein er nøydd til å vere varsame.

– Dette handlar om korleis lesaren oppfattar det. Det er det som er det avgjerande. Korleis oppfattar lesarane dei eventuelle bindingane? seier ho.

– Det overraskar meg litt at det går så kort tid før han dekkjer politiske saker, seier ho vidare.

Søndag skreiv òg Dagens Næringsliv at Teigen har blitt medlem i presselosjen.

Vil ikkje gjera greie for vennskap

Teigen avviser problemstillinga overfor Medier24, og presiserer at han var i bursdagen då han var politisk rådgjevar, og ikkje medan han var journalist. 

– Eg kjenner han på lik linje som andre politikarar og andre folk i denne gruppa menneske, seier Teigen.

– Er du venn med Tonning Riise?

– Eg kan ikkje gjera greie for kven eg er ven med og ikkje. Eg kjenner han. Det var fleire journalistar i bursdagen, seier han.

I ein sms skriv Tonning Riise følgjande til Medier24:

«Jeg synes dette er en nokså meningsløs sak. Jeg kjenner selvsagt Espen fra tiden han jobbet i Stortinget og regjeringsapparatet. Det gjelder også mange andre i politikk og media. Forøvrig var det nok neppe ønsket om å innlede et forhold med meg, som gjorde at Espen forlot politikken.»

På spørsmål om det var ein spesiell grunn til at han gjekk til nettopp Teigen og Nettavisen om saka, svarar han:

«Nei. Teksten som Nettavisen har referert ligger også åpent ute på min fb-side.»

Vidare skriv Tonning Riise:

«Jeg hadde et veldig hyggelig 30-års lag, der jeg samlet et 60-talls både fjerne og nære venner og bekjente, uten at jeg har noe behov for å kategorisere alle som var der eller alle de andre som også var invitert.»

– God medarbeidar

Klubbleiar Mæland tykkjer ikkje artikkelen om Tonning Riise er problematisk.

I ein sms skriv han til Medier24:

«Dette var en blank nyhet utstyrt med disclaimer, så denne i seg selv er ikke så problematisk. Det vi fryktet var mer en slagside i hans journalistiske arbeid, som i hovedsak er offentlig forbruk, et felt som tangerer politikk. Der synes jeg han har vært flink og bevisst sin nye rolle. Så er dette en pågående prosess både for han og redaksjonen. Det viktige synes jeg, er at redaksjonen og han har en bevissthet rundt dette. Men altså: Alt i alt er Espen Teigen en god medarbeider som er ivrig i syn nye rolle.»

Før Teigen hadde byrja i jobben som journalist i Nettavisen, var sjefredaktør Stavrum klar på at den tidlegare Frp-politikaren ikkje skulle dekkje saker kor han sjølv kunne vere inhabil.

– Eg trur tilsetjinga vil føre til godt og interessant stoff i Nettavisen, utan at me kjem på kant med det etiske regelverket. Me skal vere merksame på saker kor me må vere ekstra aktsam, sa Stavrum i desember.

– Ikkje nær venn

Sidan han byrja i Nettavisen har Teigen hatt stort fokus på offentleg pengebruk, og har skrive ei lang rekkjer saker for Nettavisen.Økonomi. Stavrum er for tida i USA og ville berre svare Medier24 skriftleg.

I ein sms skriv han:

«Spørsmålene dine tar opp to ulike tema: Forholdet til Espen Teigens tidligere jobb og det generelle spørsmålet om nærhet mellom journalister og kilder. Teigens primæroppgave i Nettavisen er - og vil fortsette å være - offentlig økonomi og ressursbruk. Generelt vil han stå friere i forhold til sin tidligere jobb desto lengre tid som går. Nå er det ett år siden han var rådgiver for en statsråd og fire måneder siden han sluttet som rådgiver på Stortinget. Vår vurdering er at det fortsatt er klokt at Teigen ikke dekker saker han var involvert i som rådgiver eller partipolitikk. Vi har en god politisk redaksjon som klarer det helt fint.

Når det gjelder den konkrete saken om Tonning Riise, så var det en blank nyhet som også ble sitert av de fleste andre medier. Jeg leste og godkjente artikkelen, og den inneholder også opplysningen om at Teigen tidligere har vært Frp-rådgiver. Når det gjelder det generelle forholdet mellom journalister og politikere/andre kilder, så er ikke det noe spesielt for Teigen. Han opplyser at han ikke er noen nær venn av Tonning Riise, og det at han var invitert i en bursdag gjør ham ikke inhabil til å skrive en ren nyhetssak».

– Godt skjønn

Elin Floberghagen i Norsk Presseforbund meiner lengde på karantenetid er eit skjønnsspørsmål som ikkje kan avgjerast med fasitsvar.

– Me har ikkje faste reglar i presseetikken, men det er viktig å utøve godt skjønn i desse sakene, at ein er uavhengig og at lesaren oppfattar det som uavhengig, seier ho, og legg til:

– Det er skilnad på å dra på hyttetur med nokon og å vere ein av veldig mange i eit selskap. Men ein på passe på – og vere open.

– Suppe på spiker

Teigen legg til:

– Den saka er veldig balansert og enkel. Det er ingenting spesielt med saka i det heile teke, seier Teigen til Medier24.

– Men om de er vener på privaten, kan det ha hindra deg i å stille spørsmål du elles ville ha stilt?

– Det kan ikkje sporast i den saka.

– Det vanlege ordtaket er at ein kokar suppe på spiker. Her er det ikkje ein gong ein spiker å koke suppe på. Eg har skrive ei blank nyheit om at ein politikar trekk seg. Saka har ikkje motteke eit snev av kritikk frå nokon eg kan registrere, og våre lesarar brukar sjeldan å vere tause. Det er òg opplyst i saka om min politiske bakgrunn, seier Teigen, og legg til:

– Eg vil seie eg kjenner redaktøren i Medier24, Erik Waatland, mykje betre enn han. Han har gjort ei rekkje intervju med meg. Han har intervjua meg i fire større saker samstundes som vedkommande var invitert i min bursdag i fjor - og Waatland var journalist på tidspunktet, og eg vil seie at eg kjenner han langt betre enn Kristian Tonning Riise, legg han til.

• Til orientering: Medier24-redaktør Erik Waatland deltok ikkje i Teigens bursdagsfeiring, og anser forholdet til den dåverande politiske rådgjevaren som profesjonelt.

Floberghagen understrekar at ho ikkje kjenner til eit eventuelt vennskapsforhold mellom Teigen og Tonning Riise, men er tydeleg på at ein ikkje kan skrive om gode venner.

– Det er interessant for lesaren å vite det dersom dei hadde vore gode venner. Det er ikkje slik at du ikkje kan dekke folk du har omgåast med, men nære venner blir for mykje. Eg veit ingenting om dette forholdet. Dette er akkurat som den saka Nettavisen har dekka med folk som gjekk på festen til Hadia Tajik og Kristian Skard, seier ho.