Frå venstre: Økonomiansvarleg Lars Brekke, fagmedarbeidar Leif Arne Danielsen, marknadsansvarleg Hanne Lund-Nilsen, instituttleiar Eivind Andres Lid, prosjektkoordinator Elisabeth Johansen og kontormedarbeidar Grete Fjeld. (Bilete frå 2015.)Gard L. Michalsen
Institutt for Journalistikk med vekst i 2018 – og no satsar dei på nettkurs
– Alt i alt eit jævla godt år, seier instituttleiar Eivind Fjellstad til Medier24.
Stiftelsen Institutt for journalistikk oppnådde eit driftsresultat på 979.000 kroner i 2018, opp frå 858.000 kroner året før. Omsetnaden på 25,4 millionar kroner er opp frå 22,7 millionar kroner året før.
IJ fekk ein driftsmargin på 3,8 prosent, jamt med 3,7 frå året før.
– Det er litt interessant at det er så stor etterspurnad for IJ-kurs no, seier instituttleiar Eivind Fjellstad til Medier24.
48 kurs i 2018
– Det er vekst i klassiske IJ-kurs som driv plussen i forhold til det med budsjetterte med. Det varierer frå år til år om det er ekstra i bedriftskurs, samarbeidskurs, eller reine IJ-kurs (i Fredrikstad, journ. anm.), seier han vidare.
Det vart i 2018 halde 48 IJ-kurs, opp frå 45 året før.
Ein kraftig nedgang i bedriftskurs, frå 86 til 60, skuldast i hovudsak satsinga på nettkurs, står det i rekneskapen.
– Det er alt i alt eit jævla godt år, sjølv om me har underprestert litt på bedriftskurs, seier Fjellstad.
– Me har hatt to tilsette som har brukt mykje tid på nettkurs-prosjektet. Dei har dermed ikkje hatt så mykje kapasitet til bedriftskurs.
Auke i faste kostnadar skuldast ifølgje Fjellstad ei nytilsetjing, medan resten er variasjon i kurskostnadar knyt til auka omsetnad.
Tør ikkje spå ytterlegare vekst
Eivind Fjellstad, instituttleiar IJ.Gard L. Michalsen
Han ser eit stort potensial i nettkurs framover.
– Me har akkurat byrja, og har gjort ein «soft launch» no. Etter sommaren skal me køyre tung marknadsføring, så forventninga er at det skal byggje seg opp utover hausten.
– Kan det bidra til ytterlegare vekst i 2019?
– Det tør eg ikkje spå, seier han.
Fjellstad ser to faktorar som gjer nettkursing til eit spanande satsingsområde.
– Dei minste lokalavisene og fagpressa har så små redaksjonar at det er vanskeleg å sende journalistar på kurs. Den andre gjeld for heile bransjen. Når journalistar reiser på kurs, vert det meir å gjere for dei andre. Det er samvitskvalar, seier han.
Statleg støtte
Han ser ei stadig digitalisering av utdanningssektoren, og ser ingen grunn til at IJ ikkje skal følgje utviklinga.
IJ er nøgd med at staten beheld deira statlege støtte på dryge 5 millionar.
– Det er ekstremt viktig for oss, og gir oss fridom til å jobbe som me gjer. Det er kjempefint, og ein slags indikasjon på at dei tykkjer det me driv med er viktig, seier Fjellstad.
Stiftinga hadde i 2018 sysselsett totalt 11 personar, og instituttleiar Fjellstad tok ut knappe 1,2 millionar kroner i lønn.
