For eit drygt år sidan signerte ei rekkje medieorganisasjonar ei intensjonsavtale om å etablere eit felles samlingspunkt for journalistikken, kalla Pressens Hus. Blant organisasjonane som er med på prosjektet er Institutt for Journalistikk (IJ).
– Me har ikkje noko styrevedtak på det. Det er vanskeleg å seie når me tek ei avgjerd. Me driv utgreiing og det vert forhandla med ymse utleigarar. Me skal konkludere innan sommaren 2019 – kanskje før, seier instituttleiar ved IJ, Eivind Fjellstad, til Medier24.
Les meir om Pressens Hus nedst i saka.
Opnar for spontane morgonkurs
Blir dei med på flyttinga, medfører det altså at IJ flyttar frå Fredrikstad til Oslo.
– Dei største argumenta for å flytte saman med eigarane og dei andre medieorganisasjonane er å skape eit stort og levande mediemiljø som me kan dra god nytte av. Elles er det ei kjensgjerning at mange av våre kursdeltakarar kjem via Oslo, og dermed vil det bety kortare reiseveg, seier han vidare.
I november 2017 sende IJ, ved Fjellstad, eit brev til Kulturdepartementet for å få ei avklaring på om det er ein distriktspolitisk dimensjon over statsstøtta deira. Svaret frå Kulturdepartementet er, ifølgje Fjellstad, at det ikkje vil ha noko å seie.
– Me hadde eit møte og beskjeden frå Venstre og statssekretæren var at det ikkje noko å seie, seier han.
IJ får sine inntekter frå statleg støtte og avgifter frå dei om lag 130 kursa dei arrangerer årleg, inkludert bedriftskurs.
– Det me lurer er om ei Oslo-flytting vil føre til at dei Oslo-nære redaksjonane vil bruke oss meir. Svaret på det trur eg er eit – forsiktig – ja. Det gir oss andre moglegheiter. Om me skal arrangere eit dagsaktuelt morgonkurs, så er det vanskeleg når me held til her, men enkelt i Pressens Hus. Det kan opne for nye format. Då kan me gjere det saman med dei andre organisasjonane, seier han.
Kursatmosfæren
Fjellstad presiserer at størsteparten av kursa vert heldt ute på reis, hos selskapa, og at det difor ikkje vil ha so mykje å seie for drifta. IJ er likevel redd for å miste «kursatmosfæren» dei har opparbeidd i Fredrikstad, som er ein dryg times togtur sør for Oslo.
– Eit motargument er at me er veldig spent på om me klarar å gjenskape den gode kursatmosfæren me har her, kor ein går og et på restaurant og går på pub på kvelden. I Oslo er det gjerne slik at ein har ei tante ein vil besøkje, seier Fjellstad, og held fram:
Skippergata 22-26 og Universitetsgata 7-9 er dei attståande alternativa.Ole Gunnar Onsøien
– Mange set pris på å kome til Fredrikstad, slik at dei får brukt tida til å vere på kurs. Me er usikre på om me får gjenskapt det i Oslo. Når det gjeld det økonomiske, er det berre snakk om togbillett, så økonomisk er det ingen skilnad – når hotellprisane er litt lågare i Fredrikstad enn Oslo.
Pressens Hus
Det er enno uklårt kvar, og når, Pressens Hus vert realitet. Leiar for arbeidsgruppa, Per Brikt Olsen, sa til Medier24 i november at dei jobbar intenst med to lokale som står att som moglege adresser for Pressens Hus.
Skippergata 22-26 og Universitetsgata 7-9 er dei attståande alternativa.
Desse organisasjonane er knyt til prosjektet:
Mediebedriftenes Landsforening (MBL)
Landslaget for lokalaviser (LLA)
Fagpressen (F)
Norsk Presseforbund (NP)
Norsk Redaktørforening (NR)
Institutt for journalistikk (IJ)
Norsk Journalistlag (NJ)
Norsk Telegrambyrå (NTB).
I tillegg er Faktisk.no invitert med i prosjektet, og redaktør Kristoffer Egeberg har tidlegare vore positive til å vere med i samlokaliseringa.
Ei endeleg avgjerd om lokale kjem truleg ikkje før i første kvartal 2019. I 2020 skal dei etter planen vere innflyttingsklare.
Organisasjonane som er med på prosjektet har kvar sin representant med i styringsgruppa. Den litt mindre arbeidsgruppa består av direktør i Fagpressen, Per Brikt Olsen, i tillegg til Torill Roås (MBL), Bård Idås (NTB), Håkon Mosvold Larsen (NTB) og Eivind Fjellstad (IJ).
