Nyheits­redaktør Siv Berg Lutro i Strilen stiller opp for einsame under korona­krisa

– Eg er no glad i å prata og høyra historier frå folk – og eg er ein god lyttar, så kvifor ikkje, seier Siv Berg Lutro til Medier24.

Då regjeringa innførte karantenereglar og stengde ned store deler av Norge, bestemte nyheitsredaktøren i Strilen for å stilla opp som samtalepartner for dei som vil ha nokon å prata med.

Oppretta Facebook-gruppe

Saman med redaktør Eirik Langeland Fjeld oppretta dei fredag morgon Facebook-gruppa «Korona-hjelp i Nordhordland og Gulen», kor det har strøyma på med medlemmer. Avisa dekkjer kommunane i Nordhordland.

– Den har vakse med 100 i timen. I eit lokalsamfunn er det ganske mykje, seier Strilen-redaktør Eirik Langeland Fjeld.

Laurdag føremiddag har gruppa over 1.100 medlemmer.

I gruppa kan folk både be om hjelp og dela informasjon om den ekstraordinære situasjonen landet har hamna i.

– Me såg det var oppretta liknande i nabokommunar, av privatpersonar, og så tenkte me at kvifor skal ikkje avisa ta den rolla, administrera og bidra til å gjera det til ei god gruppe, seier Langeland Fjeld.

Han held fram:

– Hovudoppgåva er å lage god, nøktern journalistikk, men eg trur det er ei utfordring å tenkja nytt og gi eit tilbod som er etterspurt og ikkje berre det me alltid har gjort. Dette er ein typisk ting som oppstår utanfor media.

– Folk vil gå mindre på kafear

Det var i eit innlegg fredag føremiddag at Berg Lutro gjorde seg tilgjengeleg som samtalepartnar for dei som skulle kjenne på einsemda.

«For mange kan nok denne perioden vi er inne i no, vere vanskeleg. Folk held seg mykje heime, og det blir færre besøk til kvarandre.

Om du kjenner deg einsam og ønskjer å snakke med nokon, må du gjerne ringe meg i helga og på kveldstid», skriv Berg Lutro i gruppa.

Ho har sett at mange på Facebook tilbyr å køyra og henta varer til folk og bidra med annan kvardagsleg hjelp. Ho fryktar likevel at folk vil kjenne på einsemda utan å ha så mange å prata med.

– Folk vil jo gå mindre på kafear og kjøpesenter, seier ho.

Fire timar etter ho publiserte innlegget har det enno ikkje kome nokre telefonar.

– Men eg har batteri og telefonen er på, seier ho.

Sjølv har ho hatt heimekontor sidan torsdag, og har vore lite ute og møtt folk. Nyheitsredaktøren meiner lokalavisa speler ei svært viktig rolle i den vanskelege perioden.

– Me må berre sørgja for å laga gode lokalsaker og halda innbyggjarane og lesarane oppdatert på kva som er status kringom, seier ho.

– Verken over- eller underdramatisera

Der får ho støtte av redaktør Langeland Fjeld, som seier at lesarane set pris på dekninga deira.

– I Strilen har me lege bakpå med koronadekninga veldig lenge, og hadde veldig lite saker fram til i går, då me ikkje har hatt smittetilfelle lokalt, seier han.

Torsdag skrudde dei derimot opp eit knepp.

– I går vart me samde om å droppa alle andre saker, og køyrer no 100 prosent korona. No gjer me ikkje anna. Det var ei grei timing. Det kan diskuterast om me venta for lenge, men me skal vera noko lunde nøgd, seier han, og presiserer:

– No skal me verken overdramatisera eller underdramatisera.