– Me får tilbakemeldingar frå 15-åringar om at dei diggar Haugesunds Avis

At aviser – lokale som nasjonale – tyr til Instagram og sosiale medier for å nå nye lesarar er ikkje nytt. Men det var ikkje før Haugesunds Avis verkeleg satsa, at det viste resultat.

– Nøkkelen er kontinuitet, seier Inger Therese Holgersen, publiseringsredaktør i Haugesunds Avis, til Medier24.

Over 100.000 eksponeringar

Dei siste to åra har avisa tilsett tre «digitale» årsverk. Holgersen tok på seg oppgåva som avisas Instagram-ansvarleg, og fekk med seg journalist Stine Helgesen-Eide til jobben.

– Me får over 100.000 eksponeringar på ei veke, seier Holgersen, som står for mesteparten av aktiviteten på @haugesundsavis.

Ansvarleg redaktør Einar Tho følgjer opp:

– Det er mykje for ei avis på vår storleik. Eg har blitt imponert over det dei har gjort. Ein nyttar humor og andre verkemiddel. Om dei eldre avisfolka hadde gjort det, hadde det ikkje blitt det same.

Haugesunds Avis oppdaterer Instagram-kontoen sin dagleg, med mindre og større nyheiter, og inviterer i tillegg lesarane me «bak kulissane» i redaksjonslokala.

– Det vert eit utstillingsvindauge. Folk seier at «endeleg får eg òg lese Haugesunds Avis. Eg bur i Oslo, men her får eg endeleg sett kva saker som passar for meg». Det er veldig enkelt å kommunisere med lesarane via innboksen, seier Holgersen.

Om sakene deira er «instavenlege» har gjort publiseringsredaktøren meir bevisst på breidda i stoffet til Haugesunds Avis. Og kva saker er det som fungerer? Absolutt ikkje kva som helst, ifølgje ho.

– Bustad, arbeidsliv, og folk som får ny jobb. Dei dagane me ikkje har noko å leggje ut på Instagram, så tenkjer me at me ikkje har så gode saker, seier Holgersen.

– Me fekk tilbakemelding frå eit fotballag på 15 år at dei diggar oss på Instagram. Dei kan ikkje gi oss noko no, men det er noko med at me vert ein naturleg del av kvardagen deira allereie no, seier Holgersen.

Tho følgjer opp:

– Me veks i den yngre aldersgruppa på 35-40 år. Men om me når dei som er i 20-åra, som er endå yngre, så er det nydeleg.

– Det skjer døgnet rundt

Avisutvalet i Haugesund og Karmøy kommune er lågt. Til saman har dei to over 80.000 innbyggjarar, men dei einaste lokalavisene i regionen er Haugesunds Avis og Hnytt/Karmøynytt. I tillegg til lokalaviser i kringliggjande kommunar som Grannar, Sunnhordland og Bømlo-Nytt.

– Den store konkurransen er alt det andre – som ikkje er nyheiter. Facebook, og alle dei andre mediene. Det gjeld både på pengar og tidsbruken til folk, seier Tho.

– Kva gjer de for å bli ein del av kvardagen til folk – i konkurranse med alle dei andre «tidstjuvane»?

– Me har ein tradisjon, historie og posisjon for å vere ein del av haugalendingen sin kvardag. Men å bry oss om kva dei interesserer seg for er nøkkelen. Både ved hjelp av store oversikter frå Amedia sitt analyseverktøy og ved at frontsjef dagleg følgjer med på AB-testar, skyver saker opp og ned, og ser på lesartal og fråfall, seier han.

Og Instagram-jobben til Holgersen er ingen 8-16-jobb, ifølgje dei to. 

– Det skjer jo døgnet rundt. Eg ligg gjerne på sengekanten og oppdaterer Instagram. Men eg tykkjer berre det er gøy, seier ho til Medier24.

– Det viktigaste er kontinuitet. Om ein oppdaterer fleire gongar kvar dag forventar folk at det kjem noko. Om det ikkje gjer det på 1-2 dagar, så vil folk slutte å bry seg. Det må vere lett og ledig, og litt frå innanfor redaksjonen, med ein miks av alt. Me må ikkje vere sjølvhøgtidelege.

Vil ikkje bli for fancy

Sjølv om dei treff dei unge på Instagram, er det ikkje nødvendigvis inntekter å hente frå dei – enno. Dei meiner likevel at det er viktig å bli ein del av kvardagen deira.

– Ein treff mange potensielle lesarar – som ikkje nødvendigvis kan abonnere på oss no – men det vert ein del av livet deira kvar einaste dag. Det vert ei merkevare ein ikkje kan kjøpe for pengar.

– Me har hatt kontoen lenge, men berre lagt ut sporadisk – og berre i «feeden». No gjer me det 100 prosent. Om ein gjer det halvvegs, har det ingen effekt. Me byrja å leggje ut ting på Story, og no har eg gjort det kvar dag sidan august, seier Holgersen.

Ho har funne sin måte å gjere det på, og meiner det er viktig med autentisitet, og at det ikkje vert «for fancy».

– Eg ser dei større avisene har eigen grafikk. Det skjønnar eg ikkje poenget med. Plutseleg ser det ut som ein reportasje på Instagram Story. Det vert for fint og fancy, og ein mistar heile den autentiske kjensla. Det må vere litt autentisk, med «gifs» og fargar på skrifta.