Skjermduimp av Dagsrevyen måndag denne veka. Her ved programleiarane Nina Owing og Yama Wolasmal.

Desse NRK-kontora er mest synleg på Dagsrevyen: Sjekk vinnarane her

– Det er sjølvsagt kjempefint å vera på topp.

Publisert 02.04.2020 - 05:55

Denne artikkelen er over to år gammel.

NRK Vestland og NRK Troms og Finnmark er distriktskontora i NRK som har levert flest innslag til Dagsrevyen si 19-sending på NRK dei siste 12 månadane.

Det viser ein statistikk Medier24 har bede om innsyn i.

Distriktskontora står for 25 prosent av all sendetida på Dagsrevyen, ifølgje rikskringkastaren. Sport i eigen sendebolk, vêr og gjestar i studio er ikkje medrekna.

– Det er sjølvsagt kjempefint å vera på topp. Det er viktig for oss å visa vestlandsk kvardag til resten av landet. I det ligg det at me skal laga innhald for folk som bur i Vestland, men at også resten av Norge får vita kva som skjer her, seier distriktsredaktør Dyveke Buanes i NRK Vestland til Medier24.

Fleire oppdrag

– Me har eit lokalt- og regionalt oppdrag, men også eit riksoppdrag, legg Buanes til.

– Kor opptekne er de av nasjonalt gjennomslag? Skal alle saker frå Vestland også vera interessante i til dømes Trondheim?

– Nokre gongar lagar me ei sak som berre når bredt ut i vårt område.Ei sak om bybanen i Bergen treng ikkje nødvendigvis vera veldig interessant for folk i Trondheim. Me lar ikkje ver å laga ei sak fordi den ikkje når ut riks. Samstundes meiner me at saker med eit riks- og regionalt blikk ikkje blir mindre interessant lokalt.

Distriktsredaktør Dyveke Buanes i NRK Vestland.

NRK Nordland: – Ambisjonen er toppa

Distriktsredaktør Eivind Undrum Jacobsen i NRK Nordland er ikkje nøgd med å vera på botn.

– Det betyr at me må gjera det betre. Om du ser på statistikken den siste tida, er den vesentleg betre. Me jobbar heile tida med å vera høgt oppe på statistikken og vera tydeleg representert, seier han til Medier24.

Han meiner likevel ikkje det står så dårleg til som Dagsrevyen-statistikken viser.

– Med totalleveransen er det langt betre. Ein må også sjå på kor mange saker me har på nettfronten, til dømes, seier han.

Undrum Jacobsen viser vidare Medier24 ein statistikk som viser at NRK Nordland var distriktskontoret som hadde mest skjermtid under Dagsrevyen 21 i januar, og at dei var tredje best på Dagsrevyen 19 same månad.

Vidare peiker han på at dei under deler av 2019 ikkje hadde sin faste riks-reporter til stades som ein av grunnane.

Distriktsredaktør Eivind Undrum Jacobsen i

– Men det speler ingen rolle. Ambisjonen er å vera på topp, seier Undrum Jacobsen.

– Kva er årsaka? Bryr dei seg for lite om Nordland på Marienlyst eller har de ikkje levert gode nok saker?

– Eg vil seia det er det siste. Eg tenkjer som så at me har ekstremt mange nettsaker med høg trafikk, så det er på tv me ikkje har levert godt nok, seier han, og understrekar:

– Hadde eg meint det var ei sentrum-periferi-greie hadde eg sagt det.

– Kor ofte tenkjer de på at sakene skal vera interessante også for eit rikspublikum, og ikkje berre for lokalbefolkninga?

– Alltid.

– Tilfeldig at Nordland er så langt nede

Redaktør Knut Magnus Berge i NRK sin nyheitsdivisjon seier til Medier24 at det er viktig med balanse i representasjonen.

– Me har som ambisjon å spegla heile landet – men vil vera variasjonar avhengig av kva saker som pregar dei ulike delane av landet til ein kvar tid, seier han.

Redaktør i Nyhetsdivisjonen, Knut Magnus Berge, i NRK.

– Eg ser at ein har forholdsvis mykje saker frå Troms og Finnmark, det heng truleg saman med luftambulansesaka, legg han til.

– Er det noko som overraskar deg? Som til dømes at Rogaland scorar dobbelt så høgt som Nordland?

– Rogaland har mykje oljerelatert, og vil slik sett vera godt representert jamt over. Kvifor Nordland ligg lågast denne gong tenkjer eg er tilfeldig. Det som er viktig for oss å få fram er at me ynskjer å bruka det breie nettverket NRK har til å spegla det som skjer kringom.