NRK må bli flinkare å sam­arbeida, meiner redaktør Dyveke Buanes. Slik blir nye «NRK Vestland»

Med fylkessamanslåing og nye Vestland fylke, som består av tidlegare Hordaland og Sogn og Fjordane, slår NRK saman distriktskontora og dannar NRK Vestland.

Redaktør i NRK Hordaland, Dyveke Buanes, blir redaktør for det heile medan redaktør Terje Gilleshammer i Sogn og Fjordane skal sørgja for eit godt samarbeid.

– Ein seier jo at «hadde NRK, som er fysisk plassert i heile Norge, skjønt dei kunne samarbeidd meir enn dei gjer i dag, hadde ingen kunne slå oss». Det må me bli betre på. Ei sak kan bli meir interessant med eit «case» frå ulike stader i landet, seier ho.

 

– Lett å tenkja på seg sjølv

Buanes frå Bergen blir no redaktør i Sogn og Fjordane, som er hakket større enn Hordaland i areal, men med langt færre innbyggjarar.

– Mitt inntrykk er at folk er innstilt på å få det til. Eg føler meg godt teken mot. Eg brukar å seie eg har teke av meg hordalandshatten, og teke på meg vestlandshatten, seier Buanes, som har som ambisjon å vera til stades også i Førde.

– Er hattebytet ei omstilling?

– Både ja og nei. Me har samarbeidd godt med Vestlandsrevyen, så det er godt å ha med seg. Men eg har pugga alle kommunane i Sogn og Fjordane, så eg trur eg har peiling på det no.

NRK er det desidert største mediehuset i landet, og er til stades i dei fleste krikar og krokar av landet. Men kanalen har mykje å gå på for å få ut potensialet i journalistikken, meiner Buanes.

– Me har eit uforløyst potensial, seier ho.

– Det er litt lett å tenkja på seg sjølv, i staden for å letta blikket. Redselen for å ikkje utføra lokaloppdraget godt nok. Saka blir ikkje dårlegare for lokalbefolkninga sjølv om ein har med eit case frå ein annan stad i landet. Det kan tvert om heva saka, seier ho.

Den 3. februar er nrk.no/vestland offisielt lansert. No vil distriktskontoret organisera fleire faggrupper på tvers av fylket.

– Til dømes vil ein då få ein med fokus på krim i Bergen, og ein med fokus på krim i Førde, og så kan dei samarbeida, seier ho.

 

– Byen er Bergen

NRK Vestland fann tidleg ut at dei ville ha radiosendingar frå Bergen og Førde, då det er eit meir «nært medium», som ho seier.

– Å høyra om køar på Riksveg 555 er interessant i Hordaland, men ikkje i Selje. Det held me fram med, men me skal ha fleire fellessendingar. Det er viktig å knytte innbyggjarane i nye Vestland tettare saman, seier ho.

– Korleis skal ein få til ein nettfront som er like relevant på Stord, i Nordfjord og for byfolk i Bergen?

– For veldig mange i Vestland er Bergen byen. Skjer det ting her, trur eg det vil vera interessant i Førde og Nordfjordeid. Men me må bli flinkare til å henta saker frå andre stader i fylket.

At nett er viktig, mobil går først og sosiale medium er viktig gjeld ikkje berre for NRK. Rikskringkastaren gjer akkurat det same som oss, sa sjefredaktør Trine Eilertsen i Aftenposten til Medier24 nyleg. Redaktør Ove Mellingen i Telemarksavisa delte uroa, og meinte NRK lokalt gir altfor sterk konkurranse mot kommersielle medieaktørar.

Buanes meiner derimot at NRK Vestland skil seg frå lokalaviser som til dømes Bergensavisen.

– Om du samanliknar oss med BA har dei gode saker som me ikkje går for, fordi dei er for lokale for oss som regionalt mediehus.

– Dersom me ser på kva saker som har flest lesarar visar det seg at me er spreidd i heile fylket, frå nord til sør.

Ho viser vidare til eit kart som viser kor dei mest leste sakane kjem frå. Av 50 saker med fleire enn 100.000 lesarar i tredje kvartal 2019, kom ti frå Bergen – og resten fordelt på 18 andre kommunar i fylket.

 

– Sinnssjukt

Ho meiner NRK kan bidra til å løfta saker frå eit lokalt publikum til eit nasjonalt publikum.

– Trygve Slagsvold Vedum starta sin valkamp på Stord etter vår sitatsak frå ei lokalavis om problematikk knytt til el-ferje. Det trur eg ikkje hadde skjedd dersom berre lokalavisa hadde skrive om det.

– Det er eit typisk døme på at me utfyller kvarandre. Me håpar å få til eit samarbeid, og ikkje trampa rett i bedet deira, seier ho.

I tillegg har distriktsnyheitene til NRK fått seg ein kraftig opptur i 2020, då rikskringkastaren endra sendetidspunkt frå 18:50 til 19:45, like etter Dagsrevyen, eller «prime time», som dei kallar det på fagspråket.

– Denne grafen er heilt sinnssjuk, seier Buanes.

Ho viser til at distriktsnyheitene dei fem første dagane i 2020 har hatt 60 prosent fleire sjåarar samanlikna med same periode i 2019. I snitt var det 718.000 som såg på, samanlikna med 449.000 i fjor.