VGTV vurderer å gjera som TV 2: – Me har stor sans for det dei gjer

Torsdag rulla TV 2 ut ein heilt ny oversikt over sine sportsekspertar og deira roller og bindingar. Det kom etter eit aukande fokus på dobbeltroller innanfor sportsjournalistikken, og på ekspertar og kommentatorar spesielt.

«Opplysningene som ligger til grunn for våre redaksjonelle vurderinger skal være fritt tilgjengelig for publikum», skreiv TV 2 Sporten-redaktør Vegard Jansen Hagen.

Oversikta kom i kjølvatnet av at TV 2 sin langrennsekspert Petter Northug signerte ein ny sponsoravtale med Norges Skiforbund. Førstelektor Anders Graver Knudsen ved OsloMet meinte dobbeltrolla var i strid med Ver Varsam-plakaten. Medier24 skreiv i tillegg om at handballekspert Bent Svele kommenterer kampane til si eiga dotter.

No oppmodar leiar Reidar Sollie i Norske Sportsjournalisters Forbund (NSF) andre til å følgje etter.

– Eg tykkjer det er bra at TV 2 legg ut informasjon om koplingar, og forklarar publikum kva bindingar som ligg bak aktørane. Det er eit godt prinsipp og eit fornuftig val.

– Det ville vore fint om andre tv-hus gjekk gjorde det same. Alle medium bør vera opne om bindingar, og vera flinkare til å skilja mellom kven som er journalist, ekspert og gjest, seier han.

Skal diskutere over helga

Initiativet til TV 2 vert òg rosa av konkurrentane. VGTV seier til Medier24 at dei vurderer å gjera det same.

– Eg har stor sans for det TV 2 gjer, og me skal diskutera om me skal gjera noko tilsvarande – og i så fall på kva måte. Me startar på dette over helga, men må få bruka litt tid, seier VGTV-redaktør Rolf Sønstelie til Medier24.

– Openheit og transparents er policy i VG og VGTV. Det er viktig for tilliten til media. Me er svært medvitne på at ekspertar me brukar ikkje skal ha bindingar som er problematiske for den journalistiske integriteten til programma våre. Og me har ingen problem med å vera opne om ekspertane sin bakgrunn og koplingar, og svarar på spørsmål om dette, legg han til.

Har ikkje teke stilling

Også hos NRK, Discovery og NENT ser dei positivt på grepet til TV 2 – men har ikkje vurdert ein tilsvarande oversikt sjølv. NRK vil likevel følgja nøye med.

– Men det hadde vore lærerikt å høyra om deira erfaringar etter kvart, seier sportssjef Egil Sundvor i NRK til Medier24.

Fungerande sportssjef Morten Johannessen i Discovery har heller ikkje teke stilling til om ei skal rulla ut ein liknande oversikt.

– Lista som TV 2 no har utarbeida er så fersk at me ikkje har rokke å ta ei vurdering om me skal følgja etter på same måte. Me opererer likevel alltid med openheit rundt bindingar for våre kommentatorar, og svarar ved spørsmål rundt desse, seier han.

Kommunikasjonssjef i NENT Group, Line Vee Hanum, fortel til Medier24 at dei står i ein omstillingsprosess med mange nye sportsrettar og oppbemanning på sporten.

– Me har ikkje ein rigg klar enno. Då er ei slik liste litt prematurt, men me tykkjer det er riktig og bra gjort av TV 2, seier Vee Hanum.

Dei hadde tidlegare denne veka ei samling med sportsprofilane kor mellom anna dobbeltroller og bindingar vart teken opp.

– Flott tiltak

Alle tv-husa er samde om at det er viktig med openheit rundt ruller og bindingar i sportsjournalistikken.

– Det er eit flott tiltak TV 2 set i verk, som kan vere ein måte å synleggjera potensielt problematiske forhold, seier Sundvor i NRK til Medier24.

– Me har vald å opplyse om eventuelle bindingar i samband med sendingar der me meiner bakanforliggande forhold kan vere relevante for publikum si oppfatning av innhaldet vårt, legg han til.

Der får han støtte av Johannessen i Discovery:

– Me støttar sjølvsagt full openheit rundt relasjonar og bindingar, og det er både riktig og viktig at Medier24 set fokus på denne problematikken, og at TV 2 er opne rundt mange av utfordringane me som kringkastarar står overfor.

Vil ikkje legitimere alle type bindingar

Både NRK og Discovery tek løpande vurderingar av kvart enkelt ekspert. I NRK har dei gjennomgangar av oppdrag, verv og anna som kan påverka habiliteten for kvar nye, eller forlenga, kontraktsinngåing.

– Under slike gjennomgangar må vedkommande i mange høver avslutta andre forhold for å kunne gjera jobben hos oss, seier Sundvor.

Discovery åtvarar om å bruke «openheit som trumfkort for å legitimera alle typar bindingar».

Det er Jansen Hagen samd i. Torsdag vart det kjent at skiskytingekspert Ole Einar Bjørndalen mistar TV 2-jobben då han vert trenar for Kina sitt landslag fram mot OL i Beijing i 2022.

– Sjølv om TV 2 lagar denne oversiktslista og viser til 100 % openheit, så vil ikkje alt vera greitt. Dette er eit døme på at det går ei naturleg grense, seier Jansen Hagen.