Difor tek P3 fleire musikk­program av lufta. No varslar dei flere endringar

– Det kjem fleire program kontinuerleg. No handlar det om å finne dei riktige folka til å gjere det, seier Daniel Ramberg til Medier24.

Sidan oktober 2018 har den tidlegare Natt & Dag-redaktøren vore musikksjef i P3, etter at Mats Borch Bugge slutta etter ni år i jobben.

Om det er tilfeldig eller ei, har fleire musikkprogram blitt teken av lufta av ungdomskanalen den siste tida.

Torsdag 24. januar hadde Ruben Gran siste sending av programmet sitt «Ruben». Torsdag 5. februar hadde rockeprogrammet «Tete», med programleiar Tete Lidbom, si siste sending. I skrivande stund er musikkprogrammet til Jørn Kaarstad, «Jørn», inne i si siste veke på lufta.

Når Medier24 møter dei to på Marienlyst forklarar Borch Bugge det slik:

– Me byrja å hente innsikt om behov i målgruppa rundt i landet i fjor vår. Gjennom hausten har me jobba fram nokre grep som me har tenkt er smarte og som vil imøtekoma desse krava.

Ramberg legg til:

– Det er tre veldig ulike program. Jørn ville gjere noko anna, men han vil stadig vere med på å utvikle det nye programmet med Arianrhod. Tete skal jobbe med andre ting, som Heia Fotball.

– Gjer heilt sikkert fleire endringar

Ruben Gran seier sjølv til Medier24 at grunngjevinga han fekk av leiinga var «fair», men viser til P3 for kommentarar.

– Eg har vore her i fire månadar, og det er alltid vemodig å ta ned noko frå lufta som har fungert veldig bra. Alle tre har gjort mykje for å fremja god, ung, norsk musikk. I mange år før eg kom inn i P3 er det både lagt ned og sett inn nye program og blitt restrukturert, seier Ramberg.

– Kva posisjon skal P3 ha som musikkformidlar?

– Det viktigaste P3 gjer er å halda fram med å plukke opp musikk frå unge norske artistar, og klare å blande både låtar som lyttaren ikkje veit dei vil høyre med låtar som dei kjenner og veit dei vil høyre på radio. Samstundes er det viktig å lage godt musikkjournalistisk innhald på andre flater.

– P3 har ein særeigen posisjon som gjer at me klarar å vise ein breidde, samstundes som me plukkar opp det smale – i motsetnad til andre medium, seier Ramberg.

Borch Bugge legg til:

– Me gjer heilt sikkert fleire endringar etter kvart. Ein ungdomskanal som aldri endrar seg ville det neppe vore liv laga for. 

Saka held fram under biletet.

P3-debatten i 2017

Om ein spolar eit drygt år tilbake, til november 2017, gjekk det ein lengre debatt som vart starta av skribent og musikkmeldar Peder Ebbesen, som mellom anna skriv for Gaffa og Subjekt. 

«Maktpersoner i P3 er bransjesuperhelter som kan gjøre mye godt for norsk musikk, men som nå har blitt en nepotistisk gruppe individer som er blitt litt for glade i å klappe hverandre på skuldrene», skreiv Ebbesen i ein kommentar hos Gaffa, og som vart gjengjeve i mellom anna Medier24.

I sitt tilsvar skreiv dåverande musikksjef i P3, Mats Borch Bugge, mellom anna:

«Når Ebbesen velger å trekke frem konkrete artister han savner i P3, trekker jeg hardt på smilebåndet. Han fremstår foruroligende historieløs med sine eksempler. Jeg er sikker på at eksempelvis Silja Sol og Sløtface (som til sammen har vært rotert med hele TRETTEN låter siden 2014), vil mene at de er tatt på alvor av P3.»

Ramberg meiner debatten er lagt død, og seier i tillegg at han som musikksjef i Natt & Dag fekk liknande tilbakemeldingar.

– Det har vore mykje kritikk om at me berre løftar fram vener og kjente, men eg veit at det ikkje stemmer.

– Nokon meiner me ikkje speler nok jazz og soul. Det er legitim kritikk, men ein kan ikkje rekke over absolutt alt. P3 på radio skal prate til ei målgruppe og skal treffe breitt. Klassisk felemusikk finn du andre stader.

– Me prøver så godt me kan å dekkje breitt.

Snudde trenden

Mats Borch Bugge gjorde mykje som musikksjef for P3, og var mellom anna blant arkitektane bak arrangementet P3 Gull, som går av stabelen i november kvart år.

I 2018 meinte han det var på tide med eit jobbskifte, og serverte med det stafettpinnen vidare til Ramberg. Borch Bugge er nøgd med å ha klart å «snu trenden» for kanalen.

– Me jobba for å snu lyttartrenden. Me klarte, ved tydelegare val, å rette P3 meir mot nyare musikk. Me skulle ikkje vere kanalen for 70- og 80-tals-musikk. Den posisjonen har me beheldt, for å fornye norsk musikk. P3 Gull er eg òg veldig stolt over, seier han.

– Det var bra å få på plass Daniel no, seier han vidare.

Saka held fram under biletet.

No vil dei gjera ytterlegare grep for å nå dei unge, som medium verda over meiner er stadig vanskelegare å fange merksemda til. Blant grepa som er gjort er å gi Christine Dancke meir sendetid, og ifølgje Borch Bugge vil P3 få færre flater, med lengre sendetid.

– Me er alltid på utkikk etter nye radiokonsept, og no er me aktivt ute og styrker oss på humor. Der er det eit skrikande behov.

– Vonleg vil me treffe fleire unge. Me har sett ein heilt ny radiomarknad etter FM-sløkkinga. Lyttemønstera har endra seg, og 2018 var eit dårleg radioår for P3. Me har vore flinke til å føresjå dette, og distribusjonen på andre flater gjer at me har beheldt merkevara til NRK P3, som framleis står vanvitig høgt.

Håpar på meir maktkritisk journalistikk

NRK P3 har opparbeidd seg ein sterk posisjon i sosiale medium, og har kombinert over 369.000 følgjarar på Instagram og Facebook. Dei er likevel tydelege på at det ikkje skal bli ei kvilepute, og at det er farleg å lene seg for mykje på eksterne distribusjonsplattformer.

– Det er vanskeleg å seie om me skal dyrke posisjonane me har i sosiale medium no. Alle desse plattformene du nemner er plattformer som har serverar og eigarskap utanfor Norge. Det er viktig for NRK å lage innhald som me òg serverer på eigne plattformer, så me kjem ikkje til å lene innhaldsproduksjonen vår på andres eigedom, som Facebook og slikt, seier Borch Bugge, og held fram:

– Me ser òg at me ikkje når like mange på Facebook etter algoritmeendringane dei seinaste åra. Då tenkjer me at det er betre å satsa på NRK sine eigne flater. Det er ikkje lenger slik at ein riggar oss for ein femårsperiode. Ein ser frå år til år. Me kjem til å halda fram med å lage godt innhald for radio, valbar lyd og nrk.no.

Som ein del av omlegginga til P3 vil dei satse meir på nett, og Ramberg ynskjer å styrke musikkjournalistikken til kanalen.

– Me har jobba ein del med omlegging av musikkjournalistikken som skal styrkjast på nett og i sosiale medium. Me skal tilsetje ein ny redaksjonssjef som skal følgje opp journalistane som jobbar på nett og i sosiale medium. Eg har tru på at det vil løfte musikkjournalistikken, som eg har ein fot i.

– Skal de drive meir maktkritisk journalistikk?

– Me håpar det, men så handlar det om ressursar og kor flinke me er til å prioritere sånne type saker. Det er mykje me skal dekkje. Musikkritikk, anbefalingar, større reportasjesaker, dagsaktuelle ting og festivalar, seier Ramberg.