NRK brukte 1,7 millionar kroner på å feire seg sjølv på TV: – Flaut, seier Frp-politikar

Det var kvelden 15. desember at 734.000 nordmenn samla seg føre tv-en og såg NRK feire sine 60 år med sendinga «Dagsrevyen 60 år». Etter førespurnad frå Medier24 har NRK gjeve innsyn i kostnadane for heile sendinga.

Dei totale utgiftene knyt til produksjonen av «Dagsrevyen 60 år» kom seg på 1.719.999 kroner, viser rekneskapen Medier24 har fått innsyn i.

Det får finanspolitisk talsperson i Framstegspartiet (Frp), Sivert Bjørnstad, til å reagere.

– Eg tykkjer det høyrast råflott ut. Det er mykje lisenspengar. Vel mykje. Eg veit ikkje om meirverdien for oss tv-sjåarar var verd den summen, kommenterer Bjørnstad. Han er òg nestleiar i Finanskomiteen på Stortinget.

I den over tre time lange sendinga fekk me både sofaprat med Einar Lunde, Gro Harlem Brundtland, livemusikk av Jon Niklas Rønning, kåseri av Are Kalvø, arkivklipp, ferske innslag og ein bråte med noverande og tidlegare toneangivande NRK-ansikt.

Medier24 bad om å få kostnadane spesifisert i postar som reise, losji, mat/drikke, sosiale aktivitetar, lønn, produksjon, utstyr, m.m.

Interne kjøp inneber til dømes teknisk personell, dekor, grafisk design, scenograf, lys, sminke, og materiale til dekor. Andre produksjonskostnadar er utgifter til artistar, orkester, vakthald, blomster, og liknande.

Servering bestod av mat til sendeteam, og bevertning av om lag 250 gjester. Det vart servert pølser, to valfri drikker – mineralvatn, øl eller vin – og cupcakes.

I tillegg bad Medier24 om innsyn i førehandsvedtekne rammer for produksjonen. Det er ikkje gjeve innsyn i, med heimel i Offentlegforskrifta § 1 tredje ledd bokstav j.

– Relativt billig

Programredaktør i NRK Nyheter, Kyrre Nakkim, er ikkje einig i Bjørnstad sine kommentarar.

– Eg meiner dette var vel brukte pengar. Du kan måle kostnadane på fleire måtar. Per sjåar, per minutt, eller per oppdrag. På alle desse punkta er me kjempenøgde. Det er relativt billig til å vere laurdagsunderhaldning. Me fekk fleire sjåarar enn me hadde tort å håpa på, seier han til Medier24.

Nakkim og NRK går ikkje ut med budsjett for sendinga, men hevdar dei ikkje brukte meir enn dei hadde venta.

– Det å lage denne type program er dynamisk. Det handlar mykje om ambisjonsnivå og kva dag det skal sendast. Det startar ikkje med fire timar laurdag, men med eit konsept. Så kjem kostnadane deretter. Budsjett er vanskeleg å gi ut, held han fram.

SV: – NRK skal ha trygge rammer

Mediepolitisk talsperson i SV, Freddy André Øvstegård, er ikkje like kritisk som Frp-politikaren.

– Eg, som lekmann, kan ikkje so mykje om kva det kostar å lage ein tretimars produksjon i NRK, seier han, og legg til:

– På generelt grunnlag har eg ikkje noko mot at NRK bruker pengar på å skape godt innhald, tvert imot vil eg at NRK skal ha trygge rammer for å halda fram å vera ein relevant allmennkringkastar folk i Norge er stolte av.

– Flaut

Tidleg i januar avslørte NRK at tidlegare finanspolitisk talsperson Helge André Njåstad i Frp lét Stortinget betale for innanlandsturar med familien, kor han òg hadde hatt kore jobbmøte. Saka fekk stor nasjonal merksemd, og vart mellom anna debattert på «Debatten».

Det meiner Bjørnstad gjer det heile litt ironisk.

– Eg ser føre meg merksemda frå NRK og media om me hadde gjort tilsvarande på Stortinget, med tanke på korleis dei har dekt dette feltet, seier han, og legg til:

– Eg ville ha tykt det var litt flaut.

Nakkim meiner på si side at det var ei nøktern feiring.

– Me flyr ikkje «business class», og me åt pølser i brød og lompe. Ein ser sjeldan ei meir nøktern 60-års-markering der brukaren er i fokus. Dette har me ingen dårleg samvit for. Å lage tv med høg kvalitet som samlar mange hundre tusen krev litt. Difor vart det ikkje gratis.

– Han hadde vore flau, seier han. Kva tenkjer de om det?

– Eg skal han få lov til å meine. Dette har me ikkje dårleg samvit for. Me trur publikum fekk god nytte av sendinga, seier Nakkim.

– Ei fellesskapssending

Nakkim legg vekt på at programmet var styrande for pengebruken, og at dette først og fremst handla om sendinga.

– Me ynskja å vise arkivmaterialet og heile NRK-historia til publikum, og forsøkte å lage ein underhaldande historietime. Det var det viktigaste på oss, og det har me brukt mest ressursar på. Me kunne laga eit arkivklipp-program der til dømes Atle Bjurstrøm leste opp noko i mellom, men det ville ikkje blitt same type program der me tok med oss historia inn i programmet og laga ei fellesskapssending, seier han.

Bjørntad tykkjer likevel summen er høg.

– Dette var jo pengar brukt til ei sending, og ikkje til ei intern feiring, Bjørnstad?

– Det kan du seie. NRK lagar sendinga uansett, men eg veit ikkje om meirverdien hos oss tv-sjåarar var verd den summen. Det stiller eg spørsmål ved, seier han.

Frp-politikaren legg til:

– Eg meiner det er ein veldig høg sum, og hadde me på Stortinget gjort tilsvarande hadde NRK vore etter oss med ein gong. Det er noko med liv og lære for NRK. Eg håpar at ein del av dei som har vore ivrig på Marienlyst på festbudsjett på Stortinget òg lagar sak på dette. Det tykkjer eg er eit godt tips.