– Nokre journalistar er så opptekne av teknikken at ein gløymer kva ein skal spørja om

TV lager aviser, og aviser lager TV.

Det er tema når Norske Sportsjournalisters Forbund (NSF) skal samlast for å diskutere utfordringar tysdag denne veka.

– Utfordrande å prioritere

– Korleis løyser me det? Det skal skrivast, snakkast og lagast tv-program. Alle plattformer skal fyllast, utan at bemanninga går opp, seier leiar Reidar Sollie i Norske Sportsjournalisters Forbund til Medier24.

Han er til dagleg journalist i Dagsavisen.

– Eg veit det er mange som slit med at dei skal levere til nett, papir, radio og tv. Då vert det utfordrande å sortere og prioritere journalistisk, seier han.

Morten Svesengen i Romerikes Blad er blant dei som skal prate for forsamlinga tysdag. Han skal fortelje om korleis dei dekkjer Lillestrøm SK sine Eliteserie-kampar, med både live, nettsaker, papirsaker og tv-studio etter kamp.

Andre tema som skal opp er «Football Leaks»-prosjektet til VG og samarbeidande aviser, vikarbruk, og konflikten mellom Brann og lokalavisene i Bergen, som Medier24 har skrive om dei siste to vekene.

– Gløymer kva ein skal spørje om

Sollie meiner kravet om å fylle alle dei ulike flatene går ut over kvaliteten på journalistikken.

– Det som kan skje er at ein mister fokus på innhaldet. Ein vert så oppteken av kvar det skal publiserast at ein gløymer innhaldet, seier han.

– Nokre journalistar er så opptekne av teknikken at ein gløymer kva ein skal spørje om når ein er klar. Eg veit det er ein kvardagsproblematikk, seier han.

Som redaksjonssjef i fotballmagasinet Josimar, Håvard Melnæs, var inne på i ein Medier24-artikkel førre veke, meiner Sollie det er for lite kritisk journalistikk på idretten.

Misunnelege på VG

– Skal ein dekkje sport, sportsleg, eller skal ein grave meir i djupna? Ein bør vere meir interessert i heilskapen enn berre det sportslege, seier Sollie, og legg til:

– Me er litt misunnelege på VG som har dei ressursane. Men ein kan ikkje berre klage på ressursar, då det òg går på redaksjonelle val.

Han meiner det er betring i sikte.

– Eg har ikkje like god kontroll på lokalmediene lenger, men eg oppfattar at ein er meir bevisst på det no enn tidlegare.

NSF, som vart skipa heilt tilbake i 1921, har om lag 530 medlemmar i norske medier. Dei er ein interesseorganisasjon med fokus på norske sportsjournalistar sin kvardag og arbeidsforhold.

Reidar Sollie er leiar i styret, som elles består av Gunnar Grindstein (NRK), Vegard Jansen Hagen (TV 2), Erik Johansen (NTB) og Carina Alice Bredesen (Nettavisen).