Dagsavisen med ambisjonar: Vil ekspandera og etablera fleire aviser

– Om det blir full aviskrig i mange byar, opnar det opp for at også me tør å konkurrera endå meir, seier Eirik Hoff Lysholm til Medier24.

Frå å vera på randa til konkurs for eit tiår sidan har sjefredaktør og administrerande direktør Hoff Lysholm og Dagsavisen snudd kursen, kara seg gjennom 2010-talets digitale omvelting og sikra seg ein solid digital posisjon.

Dei legg bak seg to år med betalingsmur, tre år med annonsevekst og opp mot éin million digitale brukarar vekevis. Dagsavisen har også etablert seg med lokalaviser i Stavanger (Rogalands Avis), Drammen (Fremtiden), Fredrikstad (Demokraten) og Moss (Moss Dagblad).

– Me skal vera offensive

No vil også Dagsavisen vera med på ekspansjonen lokalaviskonserna Amedia og Polaris har stått i front for dei siste to åra. Seinast over nyttår var den ferske trondheimsavisa Nidaros til Amedia på lufta.

– Me burde vore først i Trondheim. Me tenkte me skulle gjera det, men fekk ikkje til trykkeriavtalen, seier Hoff Lysholm og viser til då dei for fem år sidan gjekk ut med planar om å pusta nytt liv i Arbeider-Avisa i Trondheim.

Amedia har i tillegg i løpet av dei to siste åra kjøpt lokalavisene til Nordsjø Media og Nu Publishing i høvesvis Sørvest- og Nord-Norge, og annonsert planar om ei nummer-to-avis i Harstad. Konkurrenten Polaris Media har, saman med Agderposten, danna eit lite sørlandsimperium ved å fusjonera Agderposten og Schibsted sine lokalaviser inn i Polaris Media Sør.

– Eg tykkjer det er spanande med det som skjer med Amedia og Polaris og at andre satsar i nummer-to-marknaden. Det skapar rørsle i marknaden – som var låst og stengt. Då eg byrja for ti år trudde alle me skulle leggjast ned innan kort tid, seier Hoff Lysholm.

Og legg til:

– No er det rom for oss igjen, og me skal vera offensive.

Annonsevekst

Det har det siste året ruva nokre gråe skyer over pressestøtteavisene. Ikkje berre har Kulturdepartementet varsla omfordeling av pressestøtta til lokalavisene, men også Morgenbladet og Dagbladet har kasta seg inn i kampen om midlane. Morgenbladet har teke eit jafs av kaka, medan Dagbladet enno ikkje har fått gjennomslag.

Dagsavisen fekk i 2019 29,7 millionar kroner, ned frå 32 millionar kroner ved tildelinga året før.

– Kvart år me får kutt i pressestøtta kompenserer me med annonsevekst. Og me trur potensialet er større, og at det er mykje meir å henta ut, seier Hoff Lysholm.

Og dei siste tre åra har dei nettopp hatt vekst i omsetnaden, i 2019 ein vekst på 10,4 prosent – stort sett som følgje av digital vekst. Ifølgje eigne tal har dei 150.000-200.000 unike brukarar dagleg og opp mot éin million brukarar i veka.

– Me jobbar med å halda oss oppdatert på teknologi. Me har fått oppdatert system, og heng med på det programmatiske, og jobbar stadig med native- og content-løysingar – i tillegg til at me har satsa på ny kompetanse og nye folk. Det gir suksess, og marknaden svarar, seier marknadssjef Marius Floberghagen til Medier24.

– Krev mykje

For eit drygt år sidan tok avisa over si femte avis, eller posisjon som dei sjølv kallar det, då dei tok over drifta til økonomisk skakkøyrde Demokraten i Fredrikstad. No har dei spytta betydelege midlar inn for å berga avisa frå konkurs.

Likevel enda Dagsavisen-familien, som er eigd av Mentor Medier, nokre millionar i pluss i fjor. Medier24 har ikkje fått sjå rekneskapen enno.

– Det er mykje jobb, og det er ein grunn til at andre aviseigarar gir slepp på avisene, seier han.

– Er det fleire dødsbu å kjøpa opp?

– Det er jo ikkje så mange igjen av dei, men det finst mange stader kor det tidlegare var nummer-to-aviser og kor me kan gjera det på nytt. Me vil ekspandera vidare – modellen fungerer og kan skalerast vidare, seier Hoff Lysholm, og presiserer:

– Me er ikkje Amedia. Me klarar eit slikt prosjekt i året, ikkje ti. Det krev mykje, og me har lågare administrasjon her enn ei vanleg stor Amedia-avis har – og me driftar fem posisjonar.

Må reagera fort

Og dei følgjer godt med på marknaden om det skulle opna seg moglegheiter for fleire Dagsavisen-utgåver, seier Hoff Lysholm.

– Men me har ingenting som kjem i morgon tidleg.

– Eig Dagsavisen fleire aviser om eitt år?

– Me har ingenting som er klart no, men eg hadde iallfall ikkje satsa pengar mot det. Me skal vera i stand til å agera raskt, så når moglegheita er der må me reagera fort.