Fotballtopp hardt ut mot Morten P. i Dagbladet: – Norges minst relevante sportsjournalist

Det var i podkasten til Fædrelandsvennen, «Fotballradioen med Jesper og Pål», at sportssjef i Idrettsklubben Start, Tor-Kristian Karlsen, langa ut mot den mangeårige Dagbladet-kommentatoren.

I ein kommentar like etter siste serierunde av årets Eliteserie, skreiv Pedersen at tidlegare fotballspelar John Arne Riise snuste på Kjetil Rekdal sin jobb som trenar i Start. Det Karlsen reagerer sterkast på er Pedersen sine kommentarar knyt til Karlsen sine uttalte ambisjonar om ei topp-tre-plassering innan tre år.

– Han får meine kva han vil

– Frå skugganes dal melde Norges minst relevante sportsjournalist, Morten P. i Dagbladet – minuttar etter tapet mot Haugesund – at ein [tidlegare] spelar snusar på jobben til Kjetil Rekdal, sa Karlsen i podkasten, og følgde opp:

– Det er vel og bra om han har meiningar om meg, og om eg har prestert eller ei, men så melder han at eg har prata om topp-tre før denne sesongen. (…) Til VG sa eg at eg håpar Start kan vere med i topp-tre innan dei neste tre åra. Det treng ikkje vere umogleg, sa Karlsen – trass i at dei rykka ned frå årets Eliteserie.

Overfor Medier24 svarar Pedersen i Dagbladet slik på kritikken:

– Det var ikkje slik eg las det. Han er velkommen til å seie og meine kva han vil. Ti minuttar etter at Start rykka ned, så snakka han om cupfinale i 2019. Eg veit ikkje om det er det klokaste ein gjer. Det ville ikkje eg gjort, seier Pedersen.

Den profilerte fotballsjefen har lang fartstid i internasjonal toppfotball, og har hatt direktørstillingar i Fredrikstad Fotballklubb, AS Monaco, Maccabi Haifa og har i tillegg vore speidar for Grasshopper Zürich, Watford, Bayer Leverkusen, Zenit Saint Petersburg og sjefspeidar i Hannover 96.

– Hadde han vore relevant, hadde eg orka å ringe

I ein e-post til Medier24 utdjupar Karlsen kritikken mot Pedersen. Han reagerer mellom anna på den manglande interessa avisa har vist for Start denne sesongen.

«I løpet av sesongen har vi hatt jevnlige besøk av VG, TV 2, NRK, Eurosport, Nettavisen samt regionsavisen Fædrelandsvennen - og dermed samarbeidsavisen, Aftenposten. Disse publikasjonene har underbygget sine besøk med telefoner, meldinger og emailer både i for- og etterkant. På grunnlag av slik seriøs dekning er det blitt skrevet og filmet relevante nyhetssaker og kommentarer. I en tung sesong er ikke vinklingene på det stoffet som produseres og publiseres alltid like smigrende, det skulle bare mangle, men når mediehusene faktisk tar seg bryet til å sende vel forberedte journalister, og disse har vist nok interesse til å stille oppfølgingsspørsmål og vise førstehåndskunnskap, så har jeg full respekt for det som publiseres uansett tone eller innhold. Dagbladet eller den nevnte journalisten har vi imidlertid verken sett eller hørt fra det siste halvannet året», skriv Karlsen.

Karlsen kom òg med følgjande merknad i Fædrelandsvennen-podkasten:

– Alle veit at det (topp-tre) berre er tull. Hadde han vore litt meir relevant, hadde eg orka å ringe han dagen etter, men det orka eg ikkje.

Det er ikkje Pedersen så interessert i å kommentere.

– Kva han meiner om meg, bryr eg meg ikkje om. Det får stå for hans rekning, seier Pedersen.

– Hårsår

Den tidlegare Monaco-direktøren, som òg har figurert som ekspert for TV 2 tidlegare, meiner Riise-koplinga «i beste fall er svært spekulativ», og er i tillegg kritisk til manglande kvalitetssikring av oppgitte pengesummar Start skal ha brukt dei siste åra.

«Først og fremst fordi saken/kommentaren er bygget på et falskt premiss om at Start skulle vurdere et trenerskifte. I tillegg håndplukkes uttalelser fra undertegnede selektivt uten noen som helst forsøk på å belyse kontekst. Eksempel: i uttalelsen min til VG om "Topp 3" før sesongen ble det presisert at dette dreide seg om et perspektiv på tre år, akkurat som det virket helt uinteressant at Cupfinale-bemerkningen ble gjort noen få uker etter at klubben tapte semifinalen på Lerkendal på overtid. Dessuten er summene som nevnes i forbindelse med budsjett og satsing heller ikke kvalitetssikret på noen som helst måte. Av mye mindre betydning, men fortsatt verdt å nevne, så er det min personlige mening at en vinkling som omhandler at eks-spiller som på langt nær har fullført treningutdanningen selv skal være interessert i en opptatt trenerjobb i beste fall er svært spekulativ», skriv Karlsen.

Til det seier Pedersen:

– Det handlar ikkje om at dei har tenkt på eit trenarskifte, eller om dei vil sparke Rekdal. Han må lese ein gang til. Me snakkar om fotballbransjen, og om dei har blitt så hårsåre at dei vert opprørte over kva ein kommentator skriv, då er faktisk situasjonen verre enn eg trudde på Sørlandet.

– Kokt saman, seier Jesper Mathisen

I «Fotballradioen med Jesper og Pål» fortel fast deltakar i programmet, TV 2-ekspert og tidlegare Start-profil, Jesper Mathisen, at han er kjelda til Pedersen sin kommentar.

Slik forklarer han det:

– Overskrifta var at Riise snusar på jobben til Rekdal. No skal eg gi dykk historia om korleis dette oppstod, og så skal de få høyre korleis enkelte journalistar jobbar, sa Mathisen, og følgde opp:

– Me var på Kypros og dekkja Norges landskamp. Me var ni frå TV 2 og to frå Dagbladet. Og så gjekk me – inkludert Morten P. – ut for å spele tennis. (…) Det som skjedde dagen i forkant var at Riise, som har vore på trenarkurs – i Kristiansand – sende meg ei melding. Han kunne tenkje seg å bli trenar etter kvart, og spurde meg difor om Rekdal skal vere trenar neste år. Ikkje fordi han skal ha jobben til Rekdal, men fordi han heilt sikkert vil ringe han og spør om han kome ned og lære, trene og vere me på møter. (…) Han hadde òg sendt meldingane til Marius Skjelbæk om jobben i HamKam og til Davy Wathne om Brann-jobben.

– Det at han sender rundt slike meldingar er heilt greitt. Og så sa eg, på tennisbana, «ja no har John Arne lyst på trenarjobb» til mine kollegaer i TV 2 – medan Morten P. sat der. Det kokte han saman til denne saka.

Pedersen ynskjer ikkje å kommentere framstillinga frå Mathisen.

– Eg hugsar at var på den tennisbanen kor Jesper fortalde om sms-en frå Riise. Men kjeldene mine vil eg sjølvsagt ikkje røpe, seier han.

– Gjer seg irrelevant og useriøs

Om ryktespekulasjonane skriv Karlsen:

«Og når Jesper Mathisen i den nevnte podcasten langt på vei outer seg selv som kilden til premisset som saken ble bygget på - visstnok en helt ufarlig referanse fra Mathisen til en småtøysete sms under en tenniskamp på Kypros - gjør man seg både irrelevant og useriøs.»

Medier24 har torsdag ettermiddag ikkje lukkast å få ein kommentar frå John Arne Riise (ved agent Erland Bakken) om kva formålet med sms-ane var.